РД-дин Халкьдин Собранидиз Дагъустандин Кьилин Чарче раижнавай серенжемар кьилиз акъудун патал алава яз 2,3 миллиард манатдин такьатар чара ийидайвал я. Идан гьакъиндай Дагъустандин Гьукуматдин Председателдин Сад лагьай заместитель Гьажимегьамед Гьуьсейнова РД-дин Халкьдин Собранидин Президиумдин гегьенш заседанидал малумарна.
Ада парламентарийривай 2019-йис ва планламишнавай 2020-2021-йисарин девир патал республикадин бюджетдик дегишвилер кухтунин гьакъиндай закондин проектдин тереф хуьн тIалабна. Проект Халкьдин Собранидин нубатдин сессиядал гъида.
Республикадин бюджетдик дегишвилер кухтун вучиз чарасуз я лагьайтIа, 2018-йисан эхирра республикадин счетда амаз хьайи тахминан 10 миллиард манатдин такьатар кардик кутун герек я. Идалайни гъейри, бюджетдин делилра региондив федеральный бюджетдай алава яз агакьай пулдин такьатарни фикирда кьун теклифзава.
Гъиле авай йисан бюджетдик дегишвилер кухтун “2019-йис патал республикади вичин хивез къачунвай цIийи мажбурнамайрихъ галазни” алакъалу я. Санлай къачурла, и мурадар патал, гьа гьисабдай яз гьар йисан Чарче Дагъустандин Кьил Владимир Васильева республикадин Гьукуматдиз ганвай тапшуругъар кьилиз акъудун патални 5,9 миллиард манатдин такьатар чара ийидайди къалурнава.
Винидихъ чпикай гьеле рахай 2,3 миллиард манатдин такьатар са жерге серенжемар кьилиз акъудун патал чара авун пландик кутунва. ИкI, здравоохраненидин хиле алава яз медицинадин 10 идарада капитальный ремонт кьиле тухун, медицинадин идарайра куьгьне тадаракар (МРТ-яр, УЗИ-дин, жигерриз искусственнидаказ гар ядай аппаратар) цIийибуралди эвезун планламишнава. Мелиорациядин кIвалахар кьиле тухун патал 500 миллион манатдив агакьна такьатар чара авун фикирдиз къачунва. Ида хуьруьн майишатдин са жерге хилера, гьа гьисабдай яз прунзчивилин хилени, гьалар авайдалай хъсанардай мумкинвал гуда.
Алава такьатар инвалид аялар авай хизанрин яшайишдин кIвалерин шартIар хъсанарун патални чара ийида. И мурадар патал 300 миллион манатдин такьатар чара авун пландик кутунва. Республикадин Гьукуматдин Председателдин Сад лагьай заместителди баян гайивал, и барадай республикади гудай куьмек квекай ибарат жеда лагьайтIа, ахьтин хизанриз 10 йисан девирдалди ипотекадин кредитар кьезил шартIаралди — вацра 10 агъзур манатдилай гзаф тушиз — вахкудайвал чара ийида. “ГьакI хьайила, яшайишдин кIвалерин чIехивилелай ва абурун къиметдилай аслу тушиз, тагана амукьай пул республикадин бюджетдин гьисабдай вахкуда”, — алава хъувуна Гь.Гьуьсейнова.
Бюджетдик дегишвилер кухтадай чIавуз гъвечIи ва юкьван бизнесдиз куьмек гун, поселокрин къенепата газдин линияр тухун патал такьатар чара авун фикирда кьада. 200 миллион манатдив агакьна такьатар чкайрилай гузвай теклифрин тереф хуьн патал чара авун планламишнава. Гь.Гьуьсейнова баян гайивал, “100 школа” проект гьикI кардик кватIа, гьа саягъда къуватда жедай талукь тир программа туькIуьрнава. И проектдин тафаватлувал квекай ибарат я лагьайтIа, пулдин такьатар чкадин властри, бюджетдилай къецяй тир чешмеяр желб авуналди, финансламишун патал теклифдай гьар гьи объект хьайитIани эцигун патал чара ийиз жеда.
Гьажимегьамед Гьуьсейнова Дагъустандин Кьилин Чарче раижнавай гьеле алай йисуз кьилиз акъуддай серенжемрикайни суьгьбетна. Ихтилат хуьрерин мулкар вилик тухуникай , малдарвилин продукция гьялуникай, яшайишдин имаратар эцигуникай ва са жерге маса серенжемрикай физва.
«Лезги газет»
