Лезгистандин гьар са хуьр тIвар-ван авай ватанэгьлийралди девлетлу я. Докъузпара райондин Миграгърин хуьр къачуртIа, инай гзаф алимар, писателар, духтурар… акъатнава. Идрис Зилфикъарович Даштиевни дуьньяда тIвар машгьур хьанвай лезги алимрикай сад я.
Ам 1949-йисан 1-мартдиз Миграгърин хуьре дидедиз хьана. Анин мектеб къизилдин медалдалди куьтягьайдалай кьулухъ ам Москвада Н.Э.Бауманан тIварунихъ галай технический кьилин училищедик экечIна, 1973-йисуз вуз куьтягьна. Илимдихъ ялзавай ватанэгьлиди ина илимрин кандидатвилин, гуьгъуьнлай докторвилин диссертацияр хвена. Исятда ам технический илимрин доктор, машгьур профессор я.
Идрис Зилфикъаровича 1973-йисалай Москвада ЦНИИ-дин (илимдинни ахтармишунрин центральный институтдин махсус машиностроенидин) кьилин конструктордин заместителвиле кIвалахзава. Вичи кIелай вузда (къенин академияда) тарсарни гузва. Ам машиностроенидин хиле цIийи затIар арадал гъуниз талукь 80 патентдин, 160-далай гзаф илимдин кIвалахрин автор я.
Идрис Даштиева арадал гъайи затIар оборонадин промышленностда (“Булава”, “Тополь”, “Ярс”, “Искандер”) ишлемишзава. Илимда ам вичин пешедин рекьяй зурба алакьунар авай пешекар яз машгьур я.
Илим ва техника вилик тухунай лезги алим Россиядин ва къецепатан уьлквейрин машгьур премийриз, медалриз лайихлу хьана. Ам “Московский областдин илимдин лайихлу деятель”, “РФ-дин лайихлу конструктор” тlварарин сагьиб я. 2013-йисуз адакай илимдин ва техникадин хиле РФ-дин госпремиядин лауреат хьана.
Идрис Даштиеван стхаярни тIвар-ван авай ватанэгьлийрин жергеда ава. ЧIехи стха Мелик Зилфикъаровича — ДАССР-дин прокуратурадин органра, Келербан Зилфикъаровича — тарихдин муаллим яз, милициядин подполковник Дашти Зилфикъаровича Ненецкий автономный округдин прокурордин заместителвиле яз кIвалахна.
Идрис Даштиеван илимдин рехъ адан хва Максима агалкьунралди давамарзава. Алай вахтунда технический илимрин доктор Максим Идрисовича Москвада кIвалахзава.
Къуй чи ватанэгьлийрин дережаяр мадни кьакьан хьурай!
Куругъли Ферзалиев
