14-мартдиз Сулейман-Стальский районда райадминистрациядин кьилин заместитель Абуталиб Фатулаеван регьбервилик кваз тамам яшдихъ агакь тавунвайбурун крарин ва абурун ихтиярар хуьнин комитетдин нубатдин заседание кьиле фена.
«Лезги газетдиз» райондин администрациядин пресс-къуллугъди хабар гузвайвал, заседанидин кIвалахда КДН-дин ва ЗП-дин (комиссия по делам несовершеннолетних и защите их прав) жавабдар секретарь Мегьамедвели Аминова, ОМВД-дин ПДН-дин чIехи инспектор Валерий Ибрагьимова, райондин прокурордин куьмекчи Наида Вагьабовади, ЦСОН-дин директор Абдулфетягь Бабаева, къаюмвилин ва къайгъударвилин отделдин начальник Аида Велиевади, образованидин управленидин начальникдин заместитель Гьуьсейн Шихбабаева, УСЗН-дин начальникдин заместитель Анфиса Эмиралиевади, тамам яшдихъ агакь тавунвай жаванри ва абурун диде-бубайри иштиракна.
Заседанидал тамам яшдихъ агакь тавунвайбуруз ва абурун диде-бубайриз талукь тир 12 административный делодин материалриз килигна. Абур РФ-дин КоАП-дин 5.35-статьядин 1-паюна къалурнавай къайдаяр чIурунихъ ва диде-бубайри тамам яшдихъ агакь тавунвай чпин аялриз тербия, чирвилер гунин карда чпин везифаяр тамамар тавунихъ галаз алакъалубур тир. Заседанидин нетижада талукь ксар кIевелай тагькимарна. КДН-дин ва ЗП-дин членри са административный материалдай, хизандин гьалар хъсанзавачирвиляй ам учетдиз къачунин ва аял Кьурагь райондин КIирийрин интернат-мектебдиз рекье тунин къарар кьабулна.
«Лезги газет»
