Гьесен Аллагьярович Гьамидов 1937-йисан 1-майдиз къурушвидин хизанда дидедиз хьана. ГъвечIи чIавалай ам хипе-хъан тир вичин бубадихъ галаз суьруьяр хуьз гагь яйлахриз фидай, гагьни къишлахриз.
Ватандин ЧIехи дяведин йисара цIуд йиса авай Гьесенакай тежрибалу чубан хьана. А вахтунда колхозди адал кIелерин суьруь ихтибарнай.
1951-йисуз къурушвияр дагъдай Хасавюрт райондин чилерал куьч хьана. Зегьметдал рикI алаз тербияламиш хьанвай Гьесена колхозда кIвалахунихъ галаз санал мектебда чирвилерни къачуна.
1956-йисуз Советрин Армиядин жергейриз эвер гайи Гь.Гьамидова ЧIулав гьуьлуьн деринриз сирнавдай водолазрин кьушунра къуллугъна. Алакьунар авай дагъустанви дирибашвиляй взводдин командирдин куьмекчивилени тайинарнай. Лагьана кIанда, Ватандин вилик вичин хивевай буржи намуслувилелди кьилиз акъудунай Гь.Гьамидоваз гьуьрметдин грамотаярни къиметлу пишкешар гана. 1959-йисуз старший сержантдин чиндаваз хайи хуьруьз хтай Гь.Гьамидова йифен мектебда 10-классда кIелунар давамар хъувуна.
Яшайишдин шартIар са акьван къулайбур туширвиляй Гьесен Гьамидовавай мектебдилай кьулухъ кIелунар давамариз хьанач. Хизан хуьн адан хиве гьатнавай.
ЦIийи Къурушрин колхоздин кьиле Зегьметдин Игит Сейфедин Къулиев акъвазнавай йисара майишатда механизаторрин кьитвал авай. И месэла гьялун патал колхоздин правлениди къурушвийрикай са шумуд жегьил Хасавюртдиз механизаторар гьазурдай школадиз рекье твадай къарар кьабулна. Гьа икI, Гьесен Гьамидоваз трактористдин пеше къачудай мумкинвал хьана. Гуьгъуьнлай ада са шумуд йисуз майишатда ципицIрин багълариз дарманар ядай трактордал кIвалахна.
Са кьадар вахт арадай фейила, зегьметкешди Къазахстандин Целиноград шегьерда сантехникдин пешедай чирвилер къачуна. Са кьадар вахтунда сантехник яз зегьмет чIугурдалай кьулухъ ам элкъвена колхозда кIвалахал акъваз хъувуна ва пенсиядиз экъечIдалди хуьруьн майишатдин хиле жуьреба-жуьре везифаяр тамамарна.
Гьесен Гьамидова вичин рагьметлу уьмуьрдин юлдаш Къизбесахъ галаз санал пуд гадани вад руш кIвачел акьалдарна. Къе гьар садахъ туькIвей хизанар ава. 80 йис хьанвай Гьесен бубадин гуьгьуьлар 23 хтулдини 9 птулди шадарзава.
Загьир Гьамидов
