Зун общественный крарал машгъул жез хейлин вахт я. Ида заз республикада, уьлкведа ва къецепатани кьиле тухвай гзаф кьадар мярекатра иштиракдай ва тIвар-ван авай инсанрихъ галаз таниш жедай мумкинвал гана. Страсбург шегьерда (ана Европадин Советдин штаб-квартира ава) жуван ватанэгьлидал дуьшуьш хьайила, зи шадвилихъ кьадар амукьнач. Ам Ширинова Насият Кимовна тир. Европадин Советда чи рушан хиве Россиядин Федерациядихъ галаз образованидин, спортдин ва жегьилрин сиясатдин рекьяй Европадин Советда санал кIвалахунин везифаяр ава.
Гьелбетда, зи гьиссер вини кIвачиз акъатна. Европадин юкьни-юкьва, гзаф кьадар политикрин, публицистрин арада машгьур шегьер тир Страсбургда чи руша кIвалахун! Насията зун Страсбургдин виле акьадай чкайриз тухвана. За адахъ галаз жуьреба-жуьре темайрай ихтилатарни авуна. Ам гзаф месэлайрин гъавурда авай. Россияда, Кеферпатан Кавказда ва Дагъустанда кьиле физвай вакъиайриз ада дикъет гузвай ва гьар са месэладай и жегьил дишегьлидихъ вичин фикир авай. “Чаз ва европейвийриз садаз-садавай чирдай, тежриба къачудай ва сад-садаз менфятлу жедай пара мумкинвилер ава”, — лагьанай Насията, гражданвилин обществодин институтри санал кIвалахуникай ихтилат кватайла.
Насият Шириновадал зун мад сеферда Дербентда дуьшуьш хъхьана. Ана Дербентдин яшайишдинни психологиядин жигьетдай реабилитациядин ва дуьньядин культурадин центради, Москвада авай ЮНЕСКО-дин бюроди, ЮНЕСКО-дин крарин рекьяй РФ-дин комиссияди, ЮНЕСКО-дин секретариатди, Дербент шегьердин администрацияди тешкилнавай дишегьлийрин международный конференция кьиле физвай. Насията мярекат тешкилунин, кьиле тухунин карда, гьакI таржумачи хьизни, конференциядин материалар редактироватизни еке куьмек гана.
Заз малум хьайивал, гьар мумкинвал хьанмазди, Насият хайи ватандиз хквезва. Гьар сефердани ада вичин рагьметдиз фенвай чIехи бубайрин сурарал кьил чIугвазва. Абурукай сад гзаф йисара ФСБ-дин органра къуллугъ авур Забитов Мегьамед Рагьимович я.
Муькуь чIехи буба Заман Эльдарович Османов Ватан фашистрикай хуьдай женгера 1943-йисуз телеф хьана. Ам Ростовдин областдин Морозовск шегьердин аскеррин сурара кучукнава. И кардикайни багърийриз и мукьвара хабар хьана. Насиятан дах Ким Заманович Морозовск шегьердиз фена, дах кучукнавай сурал ада багъри ватандай тухвай накьвар вегьена.
Насият Шириновади 1989-йисуз Дагъустандин госуниверситетдин къецепатан чIаларин факультет акьалтIарна. Ингилис чIалан ва къецепатан литературадин муаллим яз, ада школайра ва ДГУ-дани кIвалахна. 1997-йисуз РАН-дин Дагъустандин илимдин центрадин чIалан, литературадин ва искусстводин институтда Насият Кимовнади филологиядин илимрин кандидатвилин диссертация агалкьунралди хвена. Жегьил алимди Россиядин МИД-дин дипломатиядин академиядани чирвилер хкаж хъувуна. Гьа ина ада международный метлеб авай са шумуд проект уьмуьрдиз куьчуьрмишунин кардани иштиракна. Гьа проектрикай сад (Кеферпатан Кавказдин Федеральный округдин жегьирин общественный организацийрин векилрихъ галаз государстводин властдин органри санал кIвалахунин жигьетдай тренинг-семинар) 2010-йисуз Дербент шегьерда кьилиз акъудна.
И мярекатдиз СКФО-дин вири регионрай жегьилрин организацийрин башчияр атанвай. Конференция Дербентда тухунин гьакъиндайни Насият Кимовнади лагьанай: “А чIавуз Дагъустандикай лап писдаказ рахазвай, ам хаталу чка я лугьуз тестикьарзавай. Конференция Дербентда тешкилуналди, вири иштиракчийриз ва масабурузни чна Дагъустанда гьалар ислягьбур тирди тестикьарна”.
Насият Шириновади Европадин Советда авай Россиядин гьамишалугъ векилханада кIвалахиз пуд лагьай йис я. Дипломатиядин корпусда мадни дагъустанвийри кIвалахзава, амма абурун арада дишегьлияр авайди сад-кьвед я. Насият Кимовнади Европадин Советда неинки Россиядин, гьакI Дагъустандин векилвални лайихлувилелди тамамарзава. Вичел тапшурмишай гьихьтин кар хьайитIани, ада рикIивай, намуслувилелди кьилиз акъудзава.
— Гьелбетда, — лугьузва ада, — алай вахтунда Европадин Советдинни Россиядин алакъаяр са акьван тарифдайбур туш. И кардиз США-ди тухузвай сиясатди къуват гузва. Нубатсуз ва герек авачир санкцийри месэлаяр гьялзавач, экономикадин жигьетдай крар гена зайифарзава, уьлквейрин арада ихтибарсузвал, къизгъинвал арадал гъизва. Са рахунни алач, ихьтин гьаларихъ метлеб жедач ва абур эхирдиз къведа.
Вичел тапшурмишзавай къуллугъриз, кIвалахра гьалтзавай четинвилеризни килиг тавуна, Насият Ширинова инсанриз ва чи уьлкведиз менфятлу, къени крарин иеси жез алахъзава. Гьавиляй завай лугьуз жеда хьи, Насият Кимовна Европада Дагъустандин патайни посол я. Вич авай чкада ада Дагъларин уьлкведин культура, образование, чи инсанрин къилихар къалурзава. Дишегьлийрин сувариз чаз адаз и гуьзел югъ тебрикиз кIанзава.
Алюсет Азизханов,
РД-дин Общественный палатадин председателдин сад лагьай заместитель
