Гатун рухсатрин пуд варз куьтягь хьайи тегьерни акунач. Школада кIелзавай аялри садбуру, хуьрериз хъфена, чIехи бубайризни бадейриз куьмекар гузвай, муькуьбур лагьайтIа, шегьерра авай чпин мукьвабурун патав атанвай… Гьар са аял патал гад рикIел аламукьдайди хьана. ЦIи школа акьалтIарайбур патал и рухсатар, вузриз арзаяр вугана, нетижаяр гуьзетиз, ахпа университетда кIелуникай, цIийи танишрикайни юлдашрикай, вилик квай студентвилин уьмуьрдикай фикирариз акъатна. Бес цIи 1-классдиз физ гьазур хьанвай, вилерай чирвилер къачунин ашкъи аквазвай бицIекарни ава эхир.
Пака Чирвилерин югъ я! Мусурманрин Къурбанд суварал гьалтунин себебдикди республикадин школайрани вузра, ссузра тарсар 4-сентябрдиз башламишдайвал я. Амма Чирвилерин йикъаз талукь линейкаяр адет тирвал 1-сентябрдиз кьиле фида. Чирвилер гунин вири идараяр школьникар, студентар кьабулиз гьазур я.
Чирвилер къачудай идараяр кутугай гьалдиз гъун, кIелунин вири шартIар тешкилун патал анин регьберри, образованидин управленийри гатун варцарани кIвалахзавай. Тамамарай кIвалахдин гьакъиндай гьахъ-гьисабар авун, нетижаяр кьун, вилик кумай, иллаки фикир гун герек тир месэлаяр раижун патал августдин совещаниярни кьиле тухвана.
Ахцегь районда, образованидин управленидин начальник Алмас Гьажиева къейд авурвал, аялриз, абур яшамиш жезвай чкадиз килиг тавуна, чирвилер ва тербия къачудай сад хьтин мумкинвилер таъминарун патал кIвалах давамарзава.
— РД-дин образованидин ва илимдин министерстводи аялрин чирвилерин ери хкажунихъ элкъуьрнавай махсус 11 программа туькIуьрнава. Абурун проектар Ахцегь райондани веревирдна ва райондин образованидин къурулуш вилик тухунин гьакъиндай махсус къарар кьабулнава. Адахъ галаз райондин вири идарайрин векилар ва муаллимар августдин совещанидал танишарна. Образованидин вири идарайра махсус паспортар гьазурнава, абурун бинедаллаз школайра кIелунин дисциплинайрай тарсар гунин ери хкаждай рекьер тайинарнава, — хабар гана Алмас Гьажиева.
Мегьарамдхуьруьн районда кьиле фейи совещанидал райондин кьил Фарид Агьмедова малумарайвал, Ярагъ-Къазмайрал эцигзавай школа алай йисан эхирдалди ишлемишиз вахкун чарасуз я. ЦIинин кIелунин йисуз Приморск хуьруьн аяларни цIийи школадиз фида.
Районда кьиле фейи августдин совещанида иштиракай Фарид Агьмедов, РД-дин Халкьдин Собранидин депутат Тагьир Исмаилов, РД-дин образованидин ва илимдин министерстводин патай ДИРО-дин кафедрадин заведующий Патимат Мегьамедова образованидин хиле чкайрал тухузвай кIвалахдихъ галаз таниш хьана. Гьар са муаллимдин хиве авай везифайрикай рахана ва чпел дамахиз жедай жегьил несил чIехи авун патал абуруз лайихлу тербия ва чирвилер гун герек тирди къейдна.
Райондин образованидин управленидин начальник Улубег Абейдуллаева вири школаярни аялрин бахчаяр кIелунин йисаз гьазур тирдакай хабар гана.
Кьурагь райондин образованидин отделдин начальник Рамазан Катибова районда кардик квай умуми чирвилерин 27 школа (абурун жергедай 8 школа — аялрин бахчаяр я), школадилай виликан чирвилер гудай 5 идара, алава чирвилер гудай 3 идара авайди къейдна. КIелунин цIийи йисаз абур вири гьазур я.
— 2017-2018-йисуз районда 1690 аял партайрихъ ацукьда. Абурукай 190 сад лагьай классдиз физвайбур я. Аялрин бахчайриз 620-далай тIимил тушиз бицIекар фида, — лагьана ада.
Р.Катибова алатай кIелунин йисан нетижаяр раижна: “106 выпускникдикай 99-да аттестат вахчуна. Абурукай 22 аял “КIелунра кьетIен агалкьунрай” медалдиз ва яру аттестатдиз лайихлу хьана”.
Сулейман-Стальский райондин образованидин идараяр авай гьалдихъ галаз райондин кьил Нариман Абдулмуталибов ва РД-дин Халкьдин Собранидин депутат Гьамидулагь Исмаилов, чкайрал фена, таниш хьана. Санлай къачурла, абур вири кIелунин цIийи йисаз гьазур я. Гьамидулагь Исмаилова предметрин классар ФГОС-дин истемишунрив кьадайвал тадаракламишуниз фикир гун герек тирди къейдна.
Нариман Абдулмуталибова райондин вири школайриз ЦIийи Макьарин школадилай чешне къачуниз эверна.
— Къенепатай школаяр лап вижевай гьалда ава, амма дараматдин винел патан акунарни, вилик квай гьаятарни къайдадиз гъана кIанда. Месела, ЦIийи Макьарин школадин багъда шуьмягърин бегьер къачуз ингье кьвед лагьай йис я. Хьайи пулни школадин хийирдиз я, — къейдна ада.
Эминхуьре 440 ученикдиз чка авай школадин дараматдиз и йикъара аялар фида. Ана кIвалахар кьиле физвай тегьердихъ галазни Н.Абдулмуталибов ва Гь.Исмаилов таниш хьана ва рази яз амукьна.
Докъузпара райондин образованидин управленидин патав гвай ИМЦ-дин регьбер Мадрид Магьмудова малумарайвал, ина кардик квай 11 школа, школадилай виликан образованидин 4, алава образованидин 7 ва спортдин 1 идара кIелунин йисаз гьазур я.
— Аялри къулай шартIара чирвилер къачун патал райондин регьберрин къаюмвилик кваз образованидин вири идарайра гьалар пайгардик ква, ремонтар авунва, хъуьтIуьзни гьазур я, — къейдна ада.
Кьиблепатан районра кьиле фейи педагогрин августдин совещанийрал агалкьунар къазанмишай, тафаватлу хьайи муаллимрив шабагьарни вахкана.
Дагъви Шериф
