И йикъара Кьурагь районда 8-мартдин сувар къейдунин сергьятра аваз волейболдай рушарин арада турнир кьиле фена. Идакай «Лезги газетдиз» райондин администрациядин пресс-къуллугъди хабар гузва.

Кьиблепатан Дагъустанда дишегьлийрин волейбол машгьур авунин, и рекьяй алакьунар авайбур винел акъудунин, спортсменкайрин арада дуствал мягькемарунин макьсаддалди тешкилай турнирда Кьиблепатан Дагъустандин рушарин командайри иштиракна.

Турнир ачухунин мярекатдал Кьурагь райондин физкультурадин, спортдин ва жегьилрин крарин отделдин начальник Рамиз Рамазанова вири иштиракчияр тебрикна. Ада рушариз 8-мартдин суварни мубаракна.

Къизгъин къугъунрин нетижада 1-чкадал кьурагь райондин рушарин команда хьана. Кьвед лагьай чка Ахцегь райондин, пуд лагьай чка Мегьарамдхуьруьн райондин ва кьуд лагьай Сулейман-Стальский райондин командайри кьуна.

Вири командаяр медалралди, грамотайралди, пулдин ва маса пишкешралди къейдна. Тешкиллувилин комитетдин къарардалди, турнирдин лап хъсан волейболистка Хизриева Маинадикай (Кьурагь) хьана. Пишкешралди Мамедова Рузанна (Ахцегь), Шамбаева Замира (Мегьарамдхуьр), Мукаилова Нарида (Кьасумхуьр) ва Аликберова Лена (Кьасумхуьр) къейдна.

Командайрив шад гьалара шабагьар вахкунин мярекатда «Кьурагь район» МР-дин кьил Замир Азизовани иштиракна. Ада вири иштиракчийриз, залда ацукьнавай дишегьлийриз дишегьлийрин сувар мубаракна, абуруз агалкьунар, бахтлувал хьун алхишна. Ада сагълам уьмуьрдин таблигъат тухунин карда ихьтин акъажунрихъ авай важиблувални къейдна.

«Лезги газет»