3-мартдиз Дагъустандин Кьил Владимир Васильев общественный бинейраллаз кардик квай вичин сад лагьай куьмекчийрихъ — азаддиз кьуршахар кьунай СССР-дин спортдин мастер, Россиядин лайихлу тренер, женгинин самбодай РД-дин хкянавай командадин старший тренер Абдулманап Нурмегьамедовахъ ва Россияда физикадинни математикадин илимрин виридалайни жегьил доктор, Дагъустандин госуниверситетдин профессор Заур Алисултановахъ галаз гуьруьшмиш хьана.
В.Васильева Заур Алисултанован кьетIен алакьунар къейдна. 27 йиса аваз чIехи алим хьанвай ада вири гьейранарна.
“Чна куь гьар садан гъалибвилел шадвалзава ва дамахзава. За фикирзава хьи, ихьтин инсанри гьамиша амал ийиз жедай хъсан меслят гуда”, — лагьана региондин Кьили.
В.Васильева гьакIни къейдна хьи, мярекатда авай вири са фикирдал алайбур, Дагъустанда спорт вилик финиз, республикади дамахдайвал, региондай бажарагълу алимар, искусстводин ва жуьреба-жуьре пешейрин векилар акъатуниз итиж ийизвайбур я.
В.Васильева рикIел хкана хьи, мукьвара рабочий пешейрай виридуьньядин акъажунар кьиле фида.
“Чун абуруз гьазур жезва, гъалиб жедай гуьгьуьлар ава. ГьакIни и мукьвара дагъустанвидикай ширинлухар гьазурунин рекьяй дуьньядин чемпион хьана. Гьар са касдихъ вичин пешедин рекьяй виниз тир агалкьунар къазанмишдай мумкинвилер хьун патал чна шартIар яратмишда”, — къейдна региондин Кьили.
«Лезги газет»
