ЦIи Махачкъала — Дербент-Баку маршрутда зарбдаказ фидай поезд кардик кутун планламишнава. Идан гьакъиндай РД-дин транспортдин ва рекьерин майишатдин министерстводин коллегиядал и ведомстводин кьиле авай Ширухан Гьажимурадова малумарна.
“Алай йисуз Сочида кьиле фейи инвестицийрин Международный форумдал Дагъустандинни “РЖД” ОАО-дин арада ракьун рекьерай пассажирар тухунин ва парар дашмишунин барадай санал кIвалахунин гьакъиндай икьрардал къулар чIугунва. 2019-йисуз ва мукьвал тир гележегда Махачкъаладин вокзал дибдай цIийикIа туькIуьр хъувун (са миллиард манатдив агакьна такьатар харж авуналди) планламишнава. Патарив гвай чкайриз ва яргъал мензилриз рейсер тамамардай поездрин вагонрин парк цIийи хъувун давамарда, Дербент-Махачкъала-Минеральный Воды-Кисловодск маршрутда, пассажирар тухудай, гьакIни Махачкъала-Дербент-Баку маршрутда зарбдаказ фидай поездар кардик кутун тешкилда”, — лагьана министрди.
РД-дин Гьукуматдин Председателдин Сад лагьай заместитель Гь.Гьуьсейнова малумарайвал, мукьвал тир вахтара шегьеррин патарив гвай чкайриз пассажирар тухунин кIвалах тешкилун патал алай аямдин къурулушар арадал гъун пландик кутунва. “ЦIинин йисалай шегьеррин патарив гвай чкайриз пассажирар тухудай поездрин вири вагонар цIийибуралди эвезда, амма и кар патал алай аямдин депо эцигун герек къведа. Планламишнавайвал, чна и кар гъиле кьада”, — малумарна ада.
Гуьруьш кьиле фидай чIавуз къейд авурвал, 2018-йисуз тухузвай пассажиррин кьадар, 2017-йисав гекъигайла, 20 процентдин, дашмишзавай парарин кьадар лагьайтIа, 6 процентдин артух хьана.
«Лезги газет»
