Чил лугьудай надир планета чи виридан умуми муг, макан я. Ам саламатдиз хуьнни вири инсаниятдин эвелимжи буржийрикай тушни бес! Федеральный Собранидиз Президент В.Путина ракъурнавай Чарчени экологиядин месэлаяр гьялун промышленностдин ва илимдин везифа, чи гьар садан жавабдарвал тирди къейд авун дуьшуьшдин кар туш. Ада жегьилризни и кардик активнидаказ экечIуниз эвер ганва, гьикI хьи, къвезмай несилрив экологиядин рекьяй саламат, виче яшамиш жез къулай шартIар авай уьлкве агакьарун, тIебиатдин девлетар, мумкинвилер (потенциал) ва Россиядин къадагъа алаз хуьзвай чкаяр, къурухар, санлай гьа ихьтин гуьзел фонд хуьн лазим я. ИкI, цIи милли цIийи паркар ачух жедай республикайрик Дагъларин уьлквени акатуни шадвал ийиз тазва. Тамар атIун тийиз, капитальный эцигунриз рехъ тагуз, анжах экологиядин туризм виликди тухун лап хъсан кар жеда.
Идахъ галаз мад са кар, месэла сихдаказ алакъалу я: хуьрерин чкаяр, мулкар виликди фидайвал авун. ИкI, Президентди Гьукуматдин фикир гьа и алай йисуз и жигьетдай цIийи программа туькIуьрунал желбнава ва ада 2020-йисан 1-январдилай кIвалахун лазим я. Чахъ тIебии ресурсар, мумкинвилер пара ава. Абур производство вилик тухун, михьи продукция гьасилун патал ишлемишна кIанзава.
И ва маса важиблу крар кьилиз акъудун, вири рекьерай виликди фин патал чаз, гьелбетда, ислягьвал герек я. Гьайиф хьи, дуьньяда чIулав къуватар гзаф ава. Абуру и чи гуьзел планета кьацIурзава, чиркинарзава: гзаф хаталу ядерный яракьрилай гъейри, инсанар гзаф кьадарра телефдай химический, биологический ва маса чIуру такьатарни акъудунихъ калтугнава, США-ди чи уьлкведин сергьятриз мукьва гьахьтин лабораторияр кардик кутунва. Ибур хаталу “къугъунар” тирдакай, жин бутылкадай акъатун хьайитIа, сифтени-сифте чкадин халкь телеф жедайдакай фикирзавач жал?!
Россия ислягь улкве я. Ада тарихдани садални гьужумнач, гьамиша ягъийри чал вегьез хьайиди я. Тарихда миллионралди чапхунчийриз Урусатдин пак гегьенш чуьллера ажал жагъана. Гьар сефердани, азадвал кIани халкьни гьунарлу армия сад, тупламиш жез, душманрин геллегьриз кьулухъди рум хгана, абур чпин магъарайра эзмишна, гьам Европа, гьам вири дуьнья къутармишна. В.Путина тагькимарна хьи, чун гила зайиф яз амач. США-дин военный базаяр, НАТО-дин геллегьар, чIулав кьушунарни яракьар чи сергьятрин лап мукьварив агудуналди, абурун ягьсуз, вагьши мурадар кьилиз акъатдач. Владимир Владимировича нубатдин сефердани чи уьлкве хуьнин замин тир “Авангард”, “Кинжал”, “Калибр” комплексрин, лазердин “Пересвет” яракьрин, гиперзвуковой “Циркон” ракетрин, цин кIаникай фидай “Посейдон” аппаратдин тIварар кьун дуьшуьшдин кар туш. Эхь, чи уьлкведи садазни къурху гузвач. Оборона мягькемарунин метлеб чи уьлкведин ва агьалийрин хатасузвал таъминарун, ифей келлейри садани чал вегьедай жуьрэт тавун паталди я.
Шихмурад Шихмурадов
