Саки виринра гьалтдай гъвечIи гьашаратрикай сад иви хъвадай ветI я. Итижлу делил ам я хьи, эркек ветIери анжах набататрин миже хъвада, дишибуру лагьайтIа, емдин еринда ивини, набататрин мижени ишлемишда. Абуру жуьреба-жуьре азарар санай масаниз тухузва.
Адетдин ветIер гзафни-гзаф Европада, Америкада иллаки цин къерехрив дуьшуьш жеда. Илимдин рекьелди ветIерикай тамам делилар 1758-йисуз Карл Линнея гана.
Алимрин делилралди, дуьньяда ветIерин 3 агъзур жуьре ава. ВетI кьве луван гьашаратрик акатзава, амма бязи жуьрейрик куьруь луварин кьвед лагьай жуьтни ква.
Эркек ветIер вини кьил кьве гьафтеда яшамиш жеда. Дишибурун уьмуьр лагьайтIа, вацралай артух хьун мумкин я. Абурун вилериз йифен вахтундани аквазва.
Гьазурайди — Куругъли Ферзалиев
