Къенин лезги халкьдин ялавлу векил, Сыктывкар шегьерда яшамиш жезвай алим-экономист, профессор Ариф Пирвелиевич Шихвердиевакай суьгьбетиз кIанзава.
А.Шихвердиев 1954-йисуз КцIар райондин Вурварин хуьре дидедиз хьана. Мектеб агалкьунралди куьтягьайдалай кьулухъ ам Ленинграддин госуниверситетдин экономикадин факультетдик экечIна, 1982-йисуз кьилин образование къачуна.
Ариф Пирвелиевич РАЕН-дин академик, Россиядин корпоративрин директоррин кIватIалдин член, Сыктывкардин университетдин экономикадин теориядин ва корпоративдин управленидин кафедрадин заведующий я.
1991-йисуз ада США-дин санайидин машгьур тешкилатра, илимдин идарайра чирвилер ва тежриба къачуна. 1993-йисуз праводин ва бизнесдин институт агалкьунралди куьтягьна, 1996-йисуз Вашингтонда вичин пешедин рекьяй тежриба кIватIна.
Зурба алакьунарни чирвилер авай ватанэгьли 1990-1995-йисара Коми республикадин госсоветдин экономикадин реформайрин рекьяй комитетдин кьиле акъвазна. 1992-1993-йисара ада Комидин гьукуматдин эменнидин фондунин председателвал авуна. Гуьгъуьнлай А.Шихвердиева Комида гьукуматдин жуьреба-жуьре къуллугъар тамамарна. 1995-1996-йисара РК-дин эменнидин рекьяй министрдин сад лагьай заместителвиле, 1992-2002-йисара республикадин къиметлу чарарин базардин комиссиядин руководитель яз кIвалахна.
1997-йисуз Ариф Пирвелиевича “Юриспруденция” пешедай РФ-дин Президентдин къвалав гвай Кефердинни РагъакIидай патан госкъуллугъдин академия куьтягьна. “Шахта”, “Капитальная” АО-рин директоррин советрин член яз, ада бизнес вилик тухуниз талукь тир цIийи ва надир программаяр уьмуьрдиз кечирмишна.
2005-йисуз Шихвердиев Сыктывкардин госуниверситетдин лап хъсан профессор лагьай тIварцIиз лайихлу хьана. Гьа и йисалай ам “Кеферпатан инвестицийрин тешкилат” ЗАО-дин директоррин советдин членни я. Илимдик чIехи пай кутунай адаз ганвай шабагьрин кьадар гзаф я.
Илимдин рекье гзаф йисара кIвалахай ватанэгьлиди СыктГУ-да корпоративный праводин илимдинни ахтармишунрин макан арадал гъана. Лезги профессорди СыктГУ-дин финансринни экономикадин, юридический факультетрин студентар патал 10 махсус курс арадал гъана. Ада илимдин кадрияр арадал гъунин карда чIехи кIвалах кьиле тухузва. Адан регьбервилик кваз илимрин кандидатвилин диссертацияр хвейибурун кьадарни тIимил туш. Ариф Пирвелиевич 150-далайни гзаф илимрин кIвалахрин, 18 монографиядин ва студентар патал акъуднавай 7 ктабдин автор я.
2011-йисалай Ариф Шихвердиев “Высшая инновационная школа бизнеса и права” НОУ-дин директор я. Илимдикни образованидик зурба пай кутунай ам Европадин илимдин консорциумдин къарардалди “Зегьметдивди ва чирвилеривди” ордендалди къейдна. 2013-йисуз адаз Россиядин тIебии академиядин президиумдин къарардалди “Илимдин мектебдин бине кутурди” лагьай гьуьрметдин тIвар гана. 2016-йисалай ам “Коми Тепловая Компания” АО-дин директоррин советдин член я.
Къуй бажарагълу алим мадни кьакьан дережайрив агакьрай!
Куругъли Ферзалиев
