Сулейман-Стальский райондин администрациядин пресс-къуллугъди «Лезги газетдиз» хабар гузвайвал, и йикъара КЦСОН-дин директор Абдулфетягь Бабаеван теклифдалди, и идарадин къуллугъчияр тир Заира Азизовади, Сижарат Къазанбеговади ва Эльвира Алагькъулиевади Испик хуьряй тир Ризаеврин хизандал, абурун 1-группадин набут хва Мирзеабас Ризаев эвленмиш хьунихъ галаз алакъалу яз, и вакъиа тебрикун патал мугьман хьана.
Хизандал кьил чIугваз финин мурад абурун гуьгьуьлар ачухун, жегьилрик руьгь кутун ва и хизан КЦСОН-дин учетда эцигун я.
Хизандин векилри мугьманар хушвилелди кьабулна, савкьатар гунай чухсагъул малумарна. Къуллугъчийри хизанди яшайишдин гьаларикай хабарар кьуна, ацалтзавай четин месэлаяр чирна. Мирзеабас Ризаева райондин КЦСОН-дин къуллугъчийрилай, иллаки директор Абдулфетягь Бабаевалай гзаф разивал авуна.
«Лезги газет»
