Агьалийрин тIалабуналди, и йикъара Сулейман-Стальский райондин кьил Нариман Абдулмуталибова, райадминистрациядин жавабдар къуллугъчиярни, Кьасумхуьруьн администрациядин кьилни галаз, марфар къвайила, яд кIватI хьуникди Кьасумхуьруьн 1-Майдин куьчеда арадал къвезвай месэладиз килигна. Идакай «Лезги газетдиз» райадминистрациядин пресс-къуллугъди хабар гузва.

ТIвар кьунвай магьалдин агьалийри райондин кьиливай авахьна физвай ва марфарикди арадал къвезвай ятар кIватI хьунин месэла гьялунин карда куьмек тIалабнай. Малум хьайивал, зирзибилар кIватI хьуникди къаналдин участокдай ятар алахьзава.

Агьалийри шегьре рекьелай магьалдиз гьахьдай куьчеда къир цунни тIалабна. Пешекаррихъни агьалийрихъ яб акалайдалай кьулухъ, Нариман Абдулмуталибова вичин заместителар тир Лацис Оружевал, Аким Жаватовал, Кьасумхуьруьн администрациядин кьил Далгат Бабаевал, АС-дин ва ЖКХ-дин отделдин начальник Мустафа Мустафаевал, талукь ксарни желбна, къейднавай месэла, гьа жергедай яз къир цуниз талукь месэлани гьялун тапшурмишна.

Къейднавай месэлаяр гьялунин кар райондин кьили вичин гуьзчивилик кутада.

«Лезги газет»