Сбербанкди тагькимарзава

Мукьвара, зур йисан къене, банкарихъ галаз алакъалу тир лутувилин цIийи жуьре пайда хьун мумкин я. “Новости” РИА-ди хабар гузвайвал, идакай Сбербанкдин правленидин председателдин заместитель Станислав Кузнецова ихтилатна.

Адан гафарай, чIуру къастар авайбуру­ роботрин къалп сесер ишлемишда. Ми­сал­дин еринда актер Инно­кентий Смоктуновскийдин сесиналди рахазвай шартIу­нин “губернаторди” регионда муьгъ эцигун патал вичихъ галаз рахазвайдавай 5 миллиард тIалабнавай аудиокхьинар раижна.

“Им артист туш, и кар роботди ийизва. Ихьтин дуьшуьшар къенин юкъуз арадал атунни мумкин я”, — къейд­на Кузнецова. Ада алава хъувурвал, Сбербанкди ихьтин тахсиркарвилериз аксивалунин серенжемар туькIуьрнава. Абур муькуь банкаризни чарасуз я.

Санал серенжемар кьабулда

Россияди, Туьркияди ва Иранди Сириядин Идлиб вилаятда авай террористрин дестейриз акси яз санал военный серенжемар кьиле тухун мумкин я. “Hurriyet” чешмеди кхьизвайвал, идан гьакъиндай Туьркиядин президент Р.Т. Эрдогана малумарна.

“Вакъиаяр вилик финин тегьердиз килигна, саналди тир гьерекатар гьар гьи чIавуз тухвайтIани жеда. Абур Идлибдин агьалийриз бахтлувални къулайвал тешкилунихъ элкъуьрнава. Чун патал важиблуди инсанрин хатасузвал я”, — лагьана Эрдогана.

Къейд ийин, 14-февралдиз Эрдогана Сочида В.Путинахъ ва Х.Руханидихъ галаз кьиле фейи саммитда иштиракна. Президентри веревирд авур кьилин месэлайрикай сад Идлибдин гьалар тир. Абур бязи къанунсуз дестейриз аксивалунин гьакъиндай гьакъикъи камар­ къачудай меслятдал атана. Кьабулиз кIанзавай серенжемрин гьакъиндай Эрдогана тамам малуматар раижнач, амма пуд терефди санал кьиле тухудай гьерекатрин гьакъиндай икьрар кутIуннава. Чешмеди алава хъийизвайвал, Идлибда яшамиш жезвай агъзурралди боевикри вилаятдин 90 процентдин мулкарал гуьзчивалзава.

Агалкьун яз гьисабзава

Украинадин президент П.Порошенкоди алай вахтунда вичин регьбервилик квай уьлкведа авай гьал тарихдин агалкьун яз гьисабзава. Идакай “Новости” РИА-ди хабар гузва.

Ада къейднавайвал, Киевдивай женгерин гьерекатар акъвазариз жедач. “Эгер Россияди гуьлле гунин гьерекатар акъвазарайтIа, ислягьвал жеда. Эгер Украинади гуьлле гун акъвазарайтIа, и уьлкве амукьдач”, — лагьана Порошенкоди. Адан гафаралди, Украинада еке дегишвилер анжах дяведин шартIара арадал гъиз алакьна.

Гуьгъуьнлай экономикадиндаз элкъвей сиясатдин кризис Украи­нада 2014-йисуз уьлкведин гьукум дегиш хьайидалай ва Евромайдандилай кьулухъ башламиш хьана. Гатфарихъ Крымда референдум кьиле фенай ва ам Россиядик ахкатнай. Гуьгъуьнлай Донбассда жен­герин гьерекатар гатIунна. Москвадихъ галаз алишверишдинни экономикадин алакъаяр атIуникди ва женгерин гьерекатарни себеб яз Украинадин экономика зайиф­ хьана.

Россиядивай куьмек кIанзава

Гаитидин меркез Порт-о-Пренсда республикадин президент Жовенель Моизаз аксивал къалурзавай серенжемар кьиле физва. Идакай “Ie JournaI de MontreaI” чешмеди хабар гузва.

Аси хьана къарагънавайбуру ватандашар уьмуьрда чарасуз тир затIаралди таъминардай алакьунар авачирвиляй Моизак тахсир кутазва. Абуру пулдин такьатар­ къанунсуз крариз серф авунай президентдал гиманзава. Митингдиз экъечIайбуру США-дихъ галаз авай ала­къайризни аксивалзава ва кризисдин месэлаяр гьялунин карда Россиядивай куьмек тIалабзава. США-дин си­ясатдиз аксивалунин лишан яз, агьалийри Америкадин пайдах кана.

Наразивал малумарунин серенжемар республикада 7-февралдилай давам жезва. И вахтунда иридалай тIимил тушиз инсанар кьена, цIудралди инсанрин сагъламвилиз зарар хьана, гьа жергедай яз журналистризни. Къалабулухдин гьалара полициядин къуллугъчийринни агьалийрин арада акьунарни хьана.

Ж.Моиза вичи президентдин къуллугъ гадардач лагьана. Ада къейд авурвал­, уьлкве наркодилеррин гъиле твадач. Гражданский дяве акъвазарун патал ада наразивал малумарзавайбуруз меслятдал атунин суьгьбетар кьиле тухун теклифна.

Трампан теклиф

США-дин президент Д.Трампа Европадин уьлквейриз Сирияда кьунвай чпин боевикар-ватандашар вахчуниз ва абур суддив вугуниз эверна. Ада раижнавай делилралди, Сирияда Европадай атанвай 800-далайни гзаф боевикар ава. Идакай Америкадин регьберди Twitter-да кхьенва. Адан фикирдалди, женгерин гьере­катрилай кьулухъ боевикар элкъвена чеб атай чкайриз хъфинин хаталувал ава.

“Экстремистар Европадиз гьикI гьахьзаватIа, абуру гьиниз финик­ умуд кутазватIа, США-диз и месэлайрал гуьзчивал тухуз кIанзавач. Чна гзаф крар, харжияр авунва, гила масабуру камар къачун ва чпелай алакьдай крар тамамарун лазим я”, — къейдна Трампа.

“Reuters” чешмеди малумарнавайвал, алай вахтунда Сириядин дустагъра 40 уьлкведай 800-дав агакьна боевикар ава. Трампа вичин кьушунар Сириядай ахкъудун кьетIнавайвиляй курдривай Америкадин куьмек галачиз, кьунвай есирар хуьз ва я абуруз и кар кIан тахьун мумкин я. Гьавиляй Вашингтондиз дустагъда авайбур чпин уьлквейрин гьукумрив вахкудай къаст ава, амма къецепатан гзаф гьукуматриз и кардик кьил кутаз кIанзавач.

Гьазурайди — Куругъли Ферзалиев