Са тIимил йикъар идалай вилик Махачкъалада, “Дагъустан” тIвар алай культурадин дворецда, халкьдин театррин республикадин килигунар кьиле фена. И серенжемдин кьилин макьсад халкьдин гьевескаррин яратмишунрай “Халкьдин” (чешнелу) коллектив” лагьай тIвар тестикьарун тир.

Мярекат РФ-дин Президентди малумарнавай театрдин Йисан сергьятра аваз тухвана.

Мярекатда  Ахцегь, Бабаюрт, Ботлих, Гумбет, Къули, Новолак, Унцукул, Чарода, Хив, Кьурагь районрин коллективри иштиракна.

Сегьнедал чпин устадвал  къалурай  коллективриз 12 касдикай ибарат тир жюриди — РФ-дин ва РД-дин искусстводин лайихлу деятелри, искусствоведри, РД-дин культурадин работникри къимет гана. Жюридин председатель РФ-дин лайихлу артист Хан Баширов тир.

Кьурагьрин халкьдин театрдин коллективдин артистри эвел заманадин мехъеррин адетар къалурна. Абур сегьнеламишнавайди РД-дин лайихлу артист, режиссер Шафудин Саруев тир.   Абуруз и номинацийрай — музыкадай, манияр лугьунай, сегьнеда къугъунай ва халкьдин костюмрай къимет гана. Абурай виридай райондин халкьдин театрдин коллективди хъсан къимет къазанмишна.

Кьурагьрин халкьдин театрдин коллективди къалурай сегьнедик Шафудин Саруев (наврузбегдин буба), Кевсер Фейзуллаева (наврузбегдин диде), Садуллагь ТIаибов (тамада), Мадина Муртузалиева (свас), Равидин Тагьиров (наврузбег), Масан Асланов (мирес), Фарида Жалилова ва Гьуьруьят Мегьамедова (сусан наибар), Мустафа Асланов (чIагъанчи), Ниби ТIаибов (далдамчи) халисан артистар хьиз къугъвана.

М.Агьмедова