Пешеяр гзаф ава. Амма заз акI я хьи, журналиствилин пеше кьетIенбурукай сад я. Жув и пешедин иеси яз, заз и кар хъсандиз чизва. И пешеди инсан рикIелни алачир чкайриз акъудда, хиялда авачир ксарихъ галаз танишарда.
Са тIимил вахт идалай вилик заз Кьасумхуьрел алай вахтунда вич Москва шегьерда яшамиш жезвай, тIебиатди вичиз са шумуд патахъай пай ганвай лезги руш Ферида Зумрудиновна Ибрагьимовадихъ галаз таниш жедай мумкинвал хьана.
Ферида Ибрагьимова — шаир, писатель, журналист, манидар, PR-пешекар, общественный деятель, фотограф, Москва шегьердин писателрин-таржумачийрин ва Россиядин пешекар литераторрин Союздин член, “Путь писателя” литературный агентстводин резидент, филантроп, телепередачаяр тухузвайди…
Худади ихьтин кьетIен пай ганвай лезги руш Ф.Ибрагьимовадин “дувулар” ХХ асирдин Гомер СтIал Сулейманан районда ава. Ам 1990-йисан 22-июндиз Зумрудин Мевлуьдинович ва Марал Балафендиевна Ибрагьимоврин хизанда Игит шегьер Смоленскда дидедиз хьана. Марал лезгийрин шаир Балафендидин хизанда ругуд лагьай велед я. Шиирар кхьинин пайни Феридадиз чIехи бубадилай атанва…
Марал Балафендиевнадин суьгьбетдай малум хьайивал, сифте шиирар ва гъвечIи гьикаяяр Феридади гьеле аялрин бахчада амаз кхьиз башламишна. Сифте шиирни дидедиз бахшнавайди тир.
Школада кIелзавай йисара лезги руша областдин ва Вирироссиядин литературадин конкурсра са шумудра кIвенкIвечи чкаяр кьуна, адан эсерар газетра ва журналра чапна.
ГъвечIи чIавалай рикIе журналист хьунин мурад авай Ферида, Бабынскдин 2-нумрадин юкьван школа акьалтIарайдалай гуьгъуьниз, Калуга шегьердиз фена, ана кардик квай Москвадин гуманитарно-экономический институтдин филиалдин журналистикадин ва къецепатан алакъайрин факультетдик экечIна. Ана хъсан къиметар аваз кIелунихъ галаз санал Феридади институтдин общественный уьмуьрдани активвилелди иштиракиз хьана. ИкI, лезги руш “Что? Где? Когда?” интеллектуальный къугъунин “Дети Богов” ва Калужский областдин КВН-дин студентрин лигадин “Бабуля курит трубку” командайрин капитан, илимдин кIвалахрал, социальный психологиядал машгъул студентрин Союздин руководитель тир.
Гьа са вахтунда Ферида Ибрагьимовади МГЭИ-дин газетдин хсуси корреспондент, “deti40” проектдин руководитель язни кIвалахзавай. Идахъ галаз санал ада областда машгьур журналист-фотограф Виктор Астахован курсарани кIелна, “фоторепортаж” пешедай тежриба къачуна.
Азад вахтунда Ферида эстрададин вокалдал ва перемар цунин дизайндал машгъул хьана, ада “Фотомодель 2012 ва 2013” проектра, “Мисс очарование” конкурсра (4 сеферда) иштиракна.
Са шумуд йисуз Ферида Ибрагьимовади Калуга шегьерда кардик квай Дагъустандин милли культурадин ассоциацияда жегьилрин сектордин руководителвиле ва агъсакъалрин советдин пресс-секретарвиле кIвалахна, шегьерда “Дагъустандин культурадин йикъар”, выставкаяр, акцияр, яратмишунрин межлисар кьиле тухвана, лезги кьуьлерин школа ачухна, “Дагъустандин тухум” тIвар алаз кьуьлерин ансамбль тешкилна.
“Территория смыслов на Клязьме” тIвар алаз 2015-йисуз тухвай Вирироссиядин жегьилрин форумда машгьур артист — кьуьлердайди тир Жамал Сатыбаловахъ галаз Феридади авур “Лезгинка” кьуьлуьниз агъзурралди тамашачийри гурлу капар яна.
Яратмишунрин рекье мадни кьакьан кукIушар муьтIуьгъарунин къаст рикIе авай руш 2016-йисан сентябрдилай Москва шегьерда яшамиш жезва. Ада Кавказдин халкьарин сеняткарвилин проектда кIвалахзава, пешекарвилин дережа хкажунин мураддалди федеральный метлеб авай выставкайра, маса мярекатра иштиракзава. ИкI, Ферида “Музыкальный Восток” вокалдин международный конкурсда финалдиз акъатна. Ада Москвада, “Кавказские умельцы” проектдин кьиле авай ксарин куьмекни галаз “Кавказские умельцы глазами детей” шиирринни шикилар чIугунин конкурс тешкилна. Ф.Ибрагьимовадин фикирдик Москвада кьилиз акъудиз кIанзавай маса проектарни ква.
Кьасумхуьрел таниш хьайила, Ферида Ибрагьимовади заз вичин “Кто я для тебя?”, “KAALUZHNG-2. Мир без войны”, “Мисс Муза или Как вдохновить себя на поступки”, “У тебя все получится” ктабарни пишкешна.
Феридади чаз лагьайвал, адан ктабар маса чIаларизни таржума авуна акъуднава.
Хазран Кьасумов
