— Сивяй ял къведайла, таза шивитрин къаришма сиве экъуьрда ва я са ич тIуьн меслятзава. Мадни, цIийиз гьазурнавай туьнт чайди сивяй къвезвай гьар гьихьтин хьайитIани ял квадарда.
— Франциядин алимрин ахтармишунри къалурзавайвал, 65 йисалай виниз яшара авай ва хуьрекрик зейтундин гъери (оливковый) ишлемишзавай инсанар инсульт азардик 41 процентдин тIимил азарлу жеда. Зейтундин гъериди ивидик шекер, холестерин ва давление агъуз вегьиниз куьмек гуда.
— Куркума гзаф хийирлу шей я. Ам бедендик иви тIимил хьанвай азарлуяр патал гзаф хийирлу я. Ам икI гьазурда: 1/2 стаканда авай чими некIедиз кофедин тIуруна авай каркума вегьена, хуькуьрда. Ахпа ам экуьнахъ, фу нез 30 декьикьа амайла, хъвада. И къаришмади иви кьери ва михьи ийида, ратарин ва чIулав лекьин кIвалах къайдадик кутада. ГьакIни хамунин жуьреба-жуьре азарар, хирер, кьацIар сагъарда.
— Хуквадик тIал квайла, хуьрекдин 3-4 тIуруна авай чIулав цIирицIрин (смородинадин) пешерал 1,5 стаканда авай ргазвай яд илична, 4 сятда тада. Ахпа ам куьзна, йикъа 4 сеферда 1,2 стаканда авайди ишлемишда.
— МетIер тIазвайла, ксудалди вилик анривай “звездочка” бальзам гуьцIна, чими шарф алчукда. Экуьнахъ метIера авай тIалдин гелни амукьдач.
— Нерай нефес текъвезвайла, дабанрал горчичникар эцигна, сун гуьлуьтар алукIда. Са сятдилай тумавар михьиз алатда.
— Кьил тIазвайла, келемдин са пеш, къайи цяй чуьхвена, пелел эцигна, кутIунда. Пеш чими хьайила, таза маса пеш эцигда. Кьве сеферда пеш эцигайдалай гуьгъуьниз кьилин тIал алатда.
— Лавровый пешери иммунитет хкажда. Абурукай икI менфят къачуда: 12-15 пешинал 1,5 стаканда авай ргазвай яд илична, 5 декьикьада ругуна, термосда цана, 4 сятда тада. Ахпа ам куьзна, йикъа пуд сеферда хуьрекдин са тIуруна авайди са вацран вахтунда ишлемишда.
Гьазурайди — Надият Велиева
