Дагъустандин медицинадин идараяр патал мукьвал вахтунда цифровой флюорографар маса къачуда. Абурукай 52 аппарат стационарар патал, 3 санай-масаниз тухудайбур (передвижной) я.
Аппаратар, чахутка, онкология ва жигеррин маса азарар винел акъуддайвал, агьалийрин рентгендин ахтармишунар кьиле тухун патал я. Санай-масаниз тухудай флюорографрин куьмекдалди, больницайриз тефена, халкьдин вири къатарин санлай гзаф ксар ахтармишун кьиле тухудай мумкинвал жеда.
Флюорографар маса къачун патал пулдин такьатар республикадин бюджетдай ахъайнава.
“Алай аямдин аппаратрин куьмекдалди агьалийриз флюорографиядин ахтармишунар цIийи ва вини дережада аваз кьиле тухудай, идахъ галаз сад хьиз нефес чIугвадай органрин гьал чирдай, хаталу азарар лап фад дуьздал акъуддай мумкинвал жеда”, — лугьузва РД-дин здравоохраненидин министр Жамалудин Гьажиибрагьимова.
ЦIийи флюорографрин кьетIенвал мадни адакай ибарат я хьи, куьгьнебурулай тафаватлу яз, ибурукай азарлуяр ва персонал патал авай зарар (лучевая нагрузка) агъузди, цIийи аппаратрин куьмекдалди ийизвай снимокрин ери винизди я. Им лагьай чIал я хьи, герек атай вахтунда, яни и ва я маса азардиз талукь яз шак физвайла, снимокдин гьар са чка са шумудра чIехи авуна, килигдай мумкинвал ава. Идалайни гъейри, аппаратдивай снимокар электронный базадани хуьз, гьакI абур махсус чарчел ва плёнкадал акъудизни жеда.
Гаф кватай чкадал лугьун лазим я хьи, Дагъустанда флюорографар цIийибуралди эвезунин лазимвал фадлай арадал атанвай. Чи республикада диагностикадин и тадаракрин 70 % куьгьне хьанвайбур я.
«Лезги газет»
