Чи  газетди  бегьем рекьерни  авачир дагъдин куьгьне хуь­рерикайни, абур арадал хкуникайни, гьакI Дербент-Рутул рекьин къерехда, дуьзендал, гатуз-хъуьтIуьз Самур вацIун ванцел, багъларин юкьва авай, виш йисара анал экI я хьанвай, амма эхиримжи вахтара югъ-къандавай гъвечIи жезвай Муьгъверганрин жемятдикайни кхьизва. Амма гьукуматдин талукь идараяр лагьайтIа, саки киснава. Вучиз?

СССР чукIурна халкьдин девлетар тарашуникди муьгъверганвийрихъ виликдай хуьр гъвечIизмаз аваз хьайи усадьбаяр, багъ-бахча дигидай ядни амукьнач. Йисалай-суз хуьр чIехи жердавай  артух хьана халкьдин игьтияжарни. ГъарикI  хьайи хуьруьн агьалийри йисаралди гьикьван  минетар, кхьинар авунатIани, чи ялвардиз дикъет гудай, халкьдин дердида къекъведай кас хьанач хьи, хьанач.

Гьарай-эвер, арза-ферзе себеб яз,  гатун 2-3 вацра, сутка­да 5-6 сятда хуьре цин насосри кIвалахзава. Рекьерни, са бязи кIвалерни, гьаятарни кваз  ци къачузва.

Виликдай чIура аваз хьайи хуьруьн булахар мумкинвилер авай ксари, шлангра туна, чпин кIвалериз гъанва.

Чуьлда хъвадай яд амачирвиляй хуьруьнвийрихъ амай сад-вад мални  куьчейра жезва, идан-адан салариз гьахь­зава­.

Халкьдиз кIвалахиз кIамач. Амай хуьрера хьиз, чубан-не­хирбанни чахъ фадлай амач. Хуьре жегьиларни амач. Абур хизанарни галаз  шегьерра яшамиш жезва.

Хуьруьн майишатда зегьметдихъ бес кьадар нетижа амач. Вуч битмишариз кIан хьайитIани, са сеферда багъдиз гьахьай малари барбатIзава са шумуд йисан зегьметдин не­тижаяр. Гьавиляй къе хуьре 80-дав агакьна кIвалерал дапIа­рар ала.

Хуьруьн бюджетда пул тахьун себеб яз, насосри харжзавай электроэнергиядин гьакъини хуьруьвай гуз хъжезмач. Бурж жезва хуьрел. Мергьяматлувилин фонд я хуьруьхъ, я райондихъ авач. Налогар, амай ватанэгьлийри хьиз, чнани гьукуматдиз гузва эхир.

Ихьтин хци месэлайрай макъалаяр газетдин чинал, гьайиф­ хьи, тIимил къвезва. Ша чна, газетдихъ галаз алакъада авайбуру хьайитIани, ихьтин дердияр, месэлаяр, гьар сада жуванбур хьиз кьуна, къарагъарин вирида санал гьялиз чалишмиш жен. Жуван гафу­налди, жез хьайитIа, пулуналдини авай четин гьалдай экъечI­дай куьмек сада масадаз ийин. Тарихдайни аквазвайвал, анжах гьа икI я чавай чи садвал хуьз жедайди, масакIа, — ваъ.

Абдулашим Гьажимурадов, Муьгъверганрин хуьр