Сулейман-Стальский райондин Курхуьруьн Мирзекерим Рагьимован тIварунихъ галай сад лагьай нумрадин юкьван мектебдин тежрибадин участокда ичин къелем чIехи жезва. Адан патав аквадай чкадал “Бесландин тар” гафар кхьенвай кьул куьрсарнава. Кьве йис вилик ихьтин рикIел аламукьдай кар авурди мектебдин лезги чIаланни литературадин муаллим Гуьзел Алиевна Межидова я.
Ихьтин камаллу кIвалах адан фикирдиз атунин себебрикай сад ам я хьи, эхиримжи вахтара мектебра терроризмдиз акси серенжемар мукьвал-мукьвал тухузва, ачух тарсар, тербиядин кьилдин сятерни тешкилзава. Гуьзел Межидовадини вичин классдин аялрихъ галаз ихьтин кIвалах кьиле тухузва, са шумуд йис вилик Кеферпатан Осетиядин Беслан шегьердин мектебда террористри авур гзаф инсанар телеф хьунал гъайи мусибатдин, вагьшивиликайни суьгьбетзава, аялар гъавурдик кутазва.
“Бесландин тар” чIехи жезвай чкадал аялар мукьвал-мукьвал физва, адахъ гелкъвезва, гележегдикай ихтилатар ийизва. Адаз килигдай, яд гудай, патав гвай чкаяр михьиз хуьдай аялрин десте тайинарнава. Ам “хъуьтIуьн шафран” сортунин, мекьи хьайилани, тарал аламукьдай ичер гъидай тар я. Къелемдал гуьзчивал тухун аялри чпи чпин арада меслятнава. Гележегда адакай сагъ тан авай, хел-пут алай фараш, тар жеда, емишар гъида. Мектебдиз мукьвара мугьман хьайи райондин кьил Нариман Абдулмуталибов и къелемдиз килигна, муаллимдиз ва аялриз сагърай лагьана.
Райсудин Набиев
