20-февралдиз Россиядин Президент Москвада, Гостиный дворда, РФ-дин Федеральный Собранидиз гьар йисан Чар гваз экъечIна. Ада вичин рахунра къецепатан политикадиз, яшайишдин месэлайриз кьетIен фикир гана.
Президентди лагьайвал, Россия кьве уьлкведин арада ислягьвилин икьрар кутIунун патал Япониядихъ галаз рахунар давамариз гьазур я. Адан фикирдалди,США-ди ДРСМД-дикай хкечIун патал къундармайрикай менфят къачуна ва и месэладай “американвийрихъ галаз зил кьазвай” вичин гъилибанар желбзава. Гьа са вахтунда В.Путина алава хъувурвал, Россиядихъ “США-дихъ галаз араяр къизгъинардай фикир авач”.
В.Путина малумарайвал, адан Чарче Россиядин къенепатан месэлайриз ва уьлкве яшайишдинни экономикадин жигьетдай вилик тухунин рекьериз асул фикир гуда. Президентди гзаф аялар авай хизанар патал цIийи кьезилвилер кардик кутун, социальный яшайишдин кIвалер эцигзавайбуруз налогрин барадай регьятвилер авун, аялар галай хизанар патал кьезил шартIарин ипотекадин программа кардик кутун теклифна.
Президентдин фикирдалди, демографиядин месэла анжах кесибвилихъ галаз женг чIугуналди гьялиз жеда. И кар патал государстводи яшайишдин жигьетдай икьрар — кьилдин ксариз куьмек гудай программа кардик кутун лазим я. Ада мадни малумарайвал, 2024-йисалди кесибвилин дережа кьве сеферда агъуз аватун лазим я.
2020-йисан эхирралди, В.Путина гьисабзавайвал, медицинадин рекьяй куьмек вири россиявийривай четинвилер авачиз менфят къачуз жедайдаз элкъуьрун герек я. Ада алава хъувурвал, властри онкологиядин азарар авайбур сагъар хъувун патал триллион манатдилай тIимил тушиз такьатар чара ийида.
Президентди Верховный суддиз ва прокуратурадиз, экономикадихъ галаз алакъалу тахсиркарвилерай силис гьикI тухузватIа, гьа кардай кьил акъудуниз эвер гана. Кьилди къачуртIа, ахьтин делойрай дустагъ авунин себебриз килиг хъувун герек я. В.Путина и рекьяй контролвал ва гуьзчивал тухунин кIвалахдиз талукь документар кьве йисан муддатда цIийи хъувун тапшурмишна. “И рекьяй са бязи ведомствойра кардик квай нормативный базаяр гьеле советрин вахтарилай амайбур я”, — къейдна ада…
«Лезги газет»
