Алай йисан эхирдалди республикадин медицинадин 26 идара цIийи къайдадал элячIда. Са жерге больницайра ва поликлиникайра вахт кьенятун ва азарлуйризни духтурриз регьят хьун патал цIийи къайдада (“Бережливая поликлиника”) учир кьада.
19-февралдиз Дагъустандин здравоохраненидин министерствода “Бережливая поликлиника” проектдай чирвилер гудай сад лагьай семинар кьиле фена. Адан кIвалах-да “Росатом” Госкорпорациядин “Бережливое производство” проектдин регьбер Владимир Арженцова ва “НМИЦ ПМ” ФГБУ-дин сифтегьан медико-санитарный куьмек тешкилдай центрадин къуллугъчи Кирилл Мочалова иштиракна. Семинардал рахунрихъ кIвалахдин цIийи къайда уьмуьрдиз кечирмишун пландик кутунвай медицинадин идарайрин кьилин духтурри яб акална.
— Чна квехъ галаз саналди кIвалах а саягъда эцигун лазим я хьи, квез куь кIвалахдин чкайрал зегьмет чIугваз, кьилинди, куь патав куьмек лазим яз къвезвай инсанриз секинвал ва къулайвал жедайвал, — къейдна Владимир Арженцова.
ЦIийи жуьре неинки поликлиникайра, гьакI “Бережливый стационар” программадин сергьятра аваз больницайрани уьмуьрдиз кечирмишун пландик ква. Абурун арада ава: республикадин диагностический центр (РДЦ), онкодиспансер, ортопедо-травматологиядин центр, Каспийскдин ва Хасавюртдин ЦГБ-яр, республикадин перинатальный центр ва мсб.
РикIел хкин: “Бережливая поликлиника” программа Дагъустанда алатай йисан октябрдилай уьмуьрдиз кечирмишзава. Сифтегьанбурун жергеда медицинадин пуд идара — аялрин 1 ва 4-нумрайрин поликлиникаяр ва чIехибурун 1-нумрадин поликлиника ава. Къенин юкъуз хъсан патахъ сифтегьан дегишвилерни аквазва. ИкI, шегьердин 1-нумрадин клинический больницадин патав гвай поликлиникайра (аялрин 4-нумрадин ва чIехибурун 1-нумрадин) цIийи къайдада кIвалахунин нетижада учиррикай азад жез алакьнава. Азарлуяр духтурдин патав атун виликамаз кхьиналди (по записи) кьабулзава. Ивидин анализар гун патал вахт, виликандав гекъигайла, 80 % тIимил хьанва.
Аялрин поликлиникадикай рахайтIа, регистратурадин ракIарихъ акъатзавай вахт 5 декьикьадилай артух туш. Виликдай инал аяларни галаз диде-бубаяр саки зур сят вахт акъудуниз мажбур жезвай. Учиррикай азад хьун патал иниз къвезвай азарлуяр пуд патал пайнава:
тади куьмек герекзавайбур;
пландин бинедаллаз, яни духтурдин патав атун патал виликамаз кхьенвайбур;
пландин бинедаллаз азарриз акси рапар ягъиз атанвайбур ва справкаяр герекзавайбур. (Адетдин поликлиникада винидихъ тIварар кьунвай азарлуяр вири са учирда акъвазун лазим къвезва).
Гьар сад вичиз лазим учирда акъвазун патал дегьлизра малуматрин стендар куьрсарнава. Къулайвилерилай азарлуярни, духтурарни рази я.
Къейд авун лазим я хьи, “Бережливая поликлиника” проект патал республикадин бюджетдай харжияр герек къвезвач, ам “Росатом” Госкорпорациядин куьмекдалди кьилиз акъудзава.
«Лезги газет»
