Мегьарамдхуьруьн райондин кьил Фарид Агьмедован теклифдалди, хайи чIалан суварин сергьятра аваз, 19-февралдиз райцентрада кардик квай медениятдин макандин дараматда райондин образованидин управленидин методический кабинетди ва хайи чIаланни эдебиятдин муаллимрин Ассоциацияди, райондин медениятдин отделдин куьмекдалди, «Руьгьдин илгьам» лишандик кваз эдебиятдин мярекат кьиле тухвана.

«Лезги газетдиз» райадминистрациядин пресс-къуллугъди хабар гузвайвал, мярекат хайи чIалаз вафалувал къалурунин, жегьил несил ата-бубайрин тарихдал рикI алаз тербияламишунин, милли адетар хуьнин макьсадралди тешкилна. Ана образованидинни медениятдин хиле кIвалахзавайбуру, хайи чIалан муаллимри, мектебра кIелзавай аялри ва райондин жемятди иштиракна.

Мярекатдиз муаллимриз-ветеранриз, лезги гафарганрин авторриз, писателризни шаирриз теклифнавай. Эдебиятдин мярекат райондин методический кабинетдин заведующий Ислам Пирмегьамедова ачухна ва ам кьиле тухун шаир, РД-дин писателрин Союздин лезги хилен руководитель Владик Батмановал ихтибарна.

Шад мярекатрин сергьятра аваз Тагьир-Къазмаяр хуьруьн мектебдин ученица, хайи чIалал лап хъсан кIелдайбурун конкурсдин муниципальный паюна гъалиб хьайи Лиана Ризаевади шаир Седакъет Керимовадин «Чун лекьер я!» шиир устадвилелди кIелна. Шиирар кIелайбур, манияр тамамарайбур мадни гзаф хьана. Райондин жуьреба-жуьре хуьрерин мектебрай ва аялрин бахчайрай атанвай аялри шиирар кIелунилай гъейри сегьнедин нумраярни къалурна.

Чешмеди алава хъийизвайвал, Мегьарамдхуьруьн районда ихьтин жуьредин мярекатар кьиле тухун адетдиз элкъуьрнава.

«Лезги газет»