Мукьвара Пятигорск шегьерда “Машук-2017” лишандик кваз кьиле фейи Кеферпатан Кавказдин жегьилрин форумди вичин кIвалах акьалтIарна. Дагъларин уьлкведай ана 360 жегьилди иштиракна, чпин алакьунарни устадвал къалурна. Алай йисан 12-августдилай 19-августдалди давам хьайи кьвед лагьай смена чи республикадин делегациядин иштиракчияр патал иллаки нетижалуди хьана.
Дагъустандин жегьилрин крарин рекьяй министерстводин пресс-къуллугъди хабар гузвайвал, дагъустанвийри и форумда спортдай къалурай нетижаярни тариф авуниз лайихлубур я. ИкI, кьилди къачуртIа, футболдай (виридалайни хъсан къугъвадайди — Ашахан Зайнулабидов), волейболдай (виридалайни хъсан къугъвадайди — Тагьир Мегьамедов) чи республикадин жегьилрин командайри -1, стритболдай (виридалайни хъсан къугъвадайди-Малик Гьажимегьамедов) 2-чкаяр къазанмишна. Столдал къугъвадай теннисдай гадайрин арада Мегьамед Гьасанова -1, Мегьамед Мегьамедалиева 2-чкаяр кьуна. Столдал къугъвадай теннисдай рушарин арада 1-чкадиз Анастасия Куц лайихлу хьана. Спортдин акъажунрин гъалибчийривни призёррив грамотаяр, дипломар ва кубокар вахкана.
Рагнеда Рамалданова
