Махачкъаладин “Анжи” командадин официальный сайтда хабар ганвайвал, мукьвара командадин кьилин тренервиле Белоруссиядай тир пешекар Вадим Скрипченко (шикилда) тайинарна. Футболист яз ада 1992-йисалай 2007-йисалди Белоруссиядин ва Россиядин чемпионатра иштиракнай. Чи уьлкведа ам ЦСКА ва “Уралан” командайра къугъвана. Идалай гъейри, Вадим Викторовича Белоруссиядин милли командадик квазни къугъунра иштиракна. Тренер ва кьилин тренер яз В.Скрипченкоди “БАТЭ”, “Минск” (кьведни Белоруссия), “Кубань”, “Урал” ва “Крылья Советов” командайра кIвалахна.
ИкI, Россиядин футболдин Премьер-лигадин (РФПЛ) 7-турдин сергьятра аваз и йикъара Казань шегьерда цIийи тренердин регьбервилик кваз “Рубин” командадихъ галаз кьиле фейи къугъуна “Анжи” 6:0 гьисабдалди кумукьна. Къугъуниз тамашиз саки 12 агъзурдав агакьна болельщикар атанвай, абурун арада дагъустанвиярни авай. Чи ватандашрин гуьгьуьлар къугъун башламишай са тIимил вахтунилай чIур хьана, гьикI хьи, 4 ва 15-декьикьайра чи командадин варариз Жонатаса ва Карадениза, талукь тирвал, кьве туп яна. Къугъунин 25-декьикьада Жонатас мад тафаватлу хьана. Са таймда пуд туп ягъуналди, мадни лувар акатай “Казань” командадин футболистри, кьвед лагьай таймни гьа ихьтин агалкьун аваз акьалтIарна. И сеферда Набиуллин, М,Вила ва Лестьенн тафаватлу хьана.
РикIел хкин: “Анжи” идалай вилик Москвадин “Динамо” командадихъ галаз къугъванай, сифте туп чи командадин футболистри янатIани, абурулай чпин артуханвал къалуриз алакьнач. Нетижада 3:1 гьисабдалди “Анжи” кумукьнай.
Сайтда мадни хабар ганвайвал, Казандай хтай юкъуз чи команда “Анжи-Арена” стадиондал тренировкайрив гатIунна, аламай йикъара и кар давамарда. 25-августдиз Каспийскдин “Анжи-Арена” стадиондал РФПЛ-дин 8-турдин сергьятра аваз кьиле тухудай нубатдин къугъуна “Анжиди” Башкортостандин “Уфа” команда кьабулда.
Рагнеда Рамалданова
