Алай вахтунда жегьил хизанар веледар аялрин бахчайриз тайинарунин четин месэладал расалмиш жезва. Аялар ясли-бахчадиз тайинар тавурла, диде-бубадивай кIвалахизни жезвач. Сад-садахъ галаз алакъалу ихьтин месэлаяр мадни ава.
Аял ясли-бахчадиз виликрай хьиз ваъ, МФЦ-да, образованидин отделда, “Госуслуги” сайтда учирда акъвазна, тайинарна кIанзава. И учирра кьезилвилер авайбурни ава. Абурал нубат, учирдиз килиг тавуна, гьалтзава. Гьа са вахтунда, хуьрерай гзаф агьалияр шегьерриз куьч хьуникди, шегьеррин садикар ва анра аялар патал чкаяр бес жезвач. И месэла иллаки хцидаказ са шумуд йис вилик акъвазнавай. Гила лагьайтIа, государстводин цIийи ясли-бахчаярни эцигнава, хсусибурни ачухнава. Хсуси садикриз вири диде-бубайривай аялар ракъуризни жезвач. Гьар вацра тайин кьадар пул гун герек я эхир.
Школадилай виликан образование авачир аялар школадизни кьабулзавач. Гьавиляй гьар са диде-бубади гьар гьикI хьайитIани вичин велед садикдиз ракъурна кIанзава. Вири и крар фикирда кьуна, Махачкъалада хизандин садикар арадал гъанва. Им государстводин садикдин къаюмвилик квай ясли-бахча я: кьве жуьредин идарадани аялрихъ галаз методикадин гьа сад хьтин къайдайрин бинедаллаз пешекарри кIвалахзава, тIуьнарни гьа сад хьтинбур я.
— Хизандин садик школадиз фидай яш тахьанвай аял, педагогвилин образование ва я аялрихъ галаз кIвалахунин тежриба ва, гьелбетда, истемишунрив кьазвай кIвал авай дидейривай арадал гъиз жеда. Ихьтин идарадин тербиячидиз ва маса къуллугъчийриз мажиб гузва, стаж къвезва ва икI мад. — Вири харжияр чна чи хивез къачузва, им государстводин садик я, амма дарамат-масад, — къейдзава РД-дин образованидин ва илимдин министр Шагьабас Шагьова.
Къе республикада ясли-бахчадиз тайинарун патал учирда акъвазарнавай аялрин кьадар 15 агъзурдалай алатнава. 3-7 йис хьанвай, чеб учирдани авай ихьтин аялриз школадилай виликан образование гун патал хизанрин садикрини куьмек гуда.
Махачкъалада хизанрин сад лагьай садикар и йикъара 25 ва 83-ясли-бахчайрин къаюмвилик кваз Муминат Маламегьамедовади ва Патимат Шагьабасовади ачухнава. Абурун кIвалахдихъ галаз республикадин образованидин ва илимдин министрни таниш хьана.
Муминат Маламегьамедова кьуд аялдин диде я. Абурукай кьведан гьеле школадиз фидай яшар тамам хьанвач. Декретдин отпуск куьтягь хьайила, ам кIвалахал хъфин лазим тир, амма садикда аялрин нубат татуниз килигна, ам кIвале ацукьуниз мажбур хьана. Жуван кIвале хизандин садик арадал гъана, кIвалахни авун, аялрихъни гелкъуьн ам патал лап вижевай рехъ тир. Алай вахтунда ада вичин балайрилай гъейри, мад вадаз тербия гузва.
— За республикадин Кьил Рамазан Абдулатиповаз ва РД-дин образованидин ва илимдин министр Шагьабас Шагьоваз, Махачкъала шегьердин образованидин управленидиз ихьтин хизанрин дестеяр арадал гъунай сагърай лугьузва. Анжах икI завай, кIваляй экъечIни тавуна, жуван аялрихъ гелкъвез ва пешедай кIвалахиз жезва, — лугьузва Мумината.
Дагъви Шериф
