Алатай йисуз Сулейман-Стальский райондин Шихидхуьруьн, ДаркIуш-Къазмайрин, КIахцугърин, гьакIни Курхуьруьн 1-нумрадин юкьван мектебра хейлин кIвалахар тамамарна. Гьаваярни, ракъар аваз, умундиз атана. И кардини устIарриз ва рабочийриз кIвалахар манийвал авачиз тамамардай мумкинвал гана. Сифте нубатда, мектебрин къаварал алай куьгьне хьанвай ракьар, шиферар эляна, бязи чкайрилай кьелечI тахтаяр, чIулар  дегишарна, пленкайралди винел патар кIевирна. Ахпа адан винелайни гуьрчег рангадин ракьун  шиферар яна. ИкI, мектебрин къавар цIийи ва гуьрчег хьана. Зегьмет чIугур устIарризни рабочийриз хуьрерин жемятри сагърай лугьузва. 

Курхуьруьн юкьван мектебда къавар дегишарунилай гъейри, аваданламишунин маса крарни кьилиз акъудна. Анин вилик квай майдандал, аниз къвезвай кIвачин рекьера гуьрчег плитаяр туна. Мектебдиз мукьва шегьредин кьве кьиляйни, варцел агакьдалди, аялрин хатасузвал таъминарунин мураддалди рекьерин махсус лишанарни алкIурнава. И кардилай ГИБДД-ди разивал авуна.­

Ихьтин хъсан крарай хуьрерин жемятри къайгъуйрик хьайи, куьмекар гайи ксариз баркалла лугьузва.

Райсудин Набиев