Лезгийрихъ бажарагълу художникар гзаф ава. Алай вахтунда Санкт-Пе­тербургда яшамиш жезвай  Октай  Алир­заевич  Алирзаев  гьа ше­гьер­дани, Дагъустандани машгьур суьретчи я. 

О. Алирзаев 1961-йисан 9-февралдиз Ахцегьа къуллугъчидин хизанда дидедиз хьана. Ада 1969-1977-йисара­ хуьруьн 1-нумрадин юкьван ва 1973-1977-йисара художественный мектебда кIелна. Суьретар чIугунин бажарагъ авай жегьил 1977-йисуз Дагъустандин М.А.Джемалан тIвару­нихъ галай художественный училищедик экечIна. Анаг куьтягьайдалай кьулухъ черченидин ва шикилрин муаллимдин пешедин диплом гвай жегьил Ахцегьрин художест­венный мектебдиз кIвалахал ракъурна. 1981-1983-йисара Советрин Армиядин жергейра къуллугъна хтайдалай кьулухъни художественный мектебда муаллимвилин кIвалах давамарна­.

Октай Алирзаеван рагьметлу буба Алирза Асуловичан ери-бине Докъузпара райондин Миграгърин хуьряй я. 1952-йисуз Вильнюда МВД-дин мектеб куьтягьай ада, милициядин капитан яз, Ахцегь райондин РОВД-дин паспортный столдин начальниквиле кIвалахна. Рагьметлу диде Гуьлмейрам Исрафиловна (ахцегьви) кьилин образование авай физикадинни математикадин муаллим тир. Октай Алирзаеван чIехи стха Левитан алай вахтун­да Санкт-Петербургда яшамиш жезва, ана кIвалахзава. ГъвечIи стха Бахтияр РД-дин эцигунрин ва ЖКХ-дин министерствода отделдин начальник я.

Алакьунар авай художник 1984-йисуз кьисметди Ленинграддиз акъудна. Ина “Краснознаменец” заводда ВОХР-дин отряддин контролервиле кIвала­хал акъвазна. 1988-йисуз мад элкъвена ватандиз хтана, Ахцегьрин культура­дин кIвале кIвалахна. 1997-йисуз Санкт-Петербургдин И.Е.Репинан тIва­рунихъ галай живописдин, скульптурадин ва архитектурадин государстводин ака­демический институтдин графикадин факультет агал­кьун­ралди куьтягьна, гьа шегьерда “Вторая реальность” театрда художник-декораторвиле кIва­лахал акъвазна.   

Октай Алирзаева 2001-йисалай Ленинградский областдин культурадин ва искусстводин колледжда суьретрин ва живописдин рекьяй тарсар гузва­. Алай вахтунда ам и колледжда гьуьрмет, нуфуз авай кьилин дережадин муаллим я.

Адан яратмишунрин выставкаяр жуьреба-жуьре шегьерра тешкилна. Алай йисан 29-январдиз Санкт-Петербургда художникрин “Полиреализм” группадин яратмишунрин выставка ачухна. Чи ватанэгьлини и группадин векилрикай сад я.

Ада Санкт-Петербургда институт куьтягьайдалай кьулухъ шегьерда яшамиш жезвай дагъустанви художникрикай ибарат “Ачух кап” десте арадал гъана. Алатай йисуз и кIватIалдин художникри чпин яратмишунрин 21 йис къейдна. Вири и йисара О.Алирзаев, “Ачух кап” кIватIалдин председателдин заместитель яз, Дагъустандин ху­дожникрин выставкаяр тешкилунал ва кьиле тухунал машгъул хьана. 1999-йи­салай ам Санкт-Петербургдин художникрин Союздин член я.

2001-йисуз О.Алирзаева Будапештда, гуьгъуьнин йисара Великобританияда, 2016-йисуз Китайда кьиле фейи яратмишунрин международный выставкайра иштиракна. Россияда, Да­гъус­танда адаз гзаф иштираквал авай выставкаяр хьана.

Лезги суьретчидин яратмишунрал гьейранвалзавай Санкт-Петербургдин живописдин, скульптурадин ва архитектурадин государстводин академический институтдин графикадин кафедрадин доцент, Россиядин художникрин Союздин член Ю.Башкирцева кхьизвайвал, Октай Алирзаев устад ху­дожник, вичихъ авай чирвилер жегьилриз гузвай тежрибалу муаллимни я. Адан суьретриз Санкт-Петербургдин тамашачийри еке итиж ийизва.

Къейдна кIанда хьи, чи ватанэгьлидин яратмишунриз Санкт-Петер­бург­дин искусствовед Д.Северюхинани чIехи къимет гана. О.Алирзаеван суьретар “Гатфар”, “Зул” лишанрик кваз гьар йисуз кьиле физвай выставкайриз кьабулзава. Бажарагълу суьретчидин гъиликай хкатай шейэр Россияда, Германияда, Чехияда, Велико­британияда, Венгрияда хсуси коллекцийра хуьзва.

Дагъвидин яратмишунар гзафни-гзаф хайи чилихъ, дагъларихъ галаз ала­къалу я. И жигьетдай адаз, мумкин­ я, вичин ватан тир Ахцегьрин гуьрчег тIебиатди таъсирнава.

И йикъара О.Алирзаеван гъвечIи стха Бахтиярахъ галаз гуьруьшмиш хьайи вахтунда ада ихтилатайвал, Ок­тай гъвечIи чIавалай суьретар чIу­гунал машгъул хьана. Адан мурад маш­гьур художник хьун тир. Гьеле хайи хуьруьн мектебда кIелдайла, адаз тарсар гайи Жавид муаллимди Октаян бажарагъдин цIелхемар куькIвен­вайди кьатIанай. “Зи рикIел алама, 1972-йисуз ада Ленинан суьрет чI­у­гуна. Ам Крымда авай пионеррин “Артек” лагерда тешкилнавай аялрин яратмишунрин выставкадиз ракъурнай. Са тIимил вахтундилай сад лагьай чка кьунва лагьай грамота хтанай. Им Окта­ян уьмуьрда сад лагьай агалкьун хьана. Зегьметдал рикI алайвиляй ам искусствода кьакьан дережайрив агакьна. Аял чIаван мурад кьилиз акъат­на. И кардал за дамахзава”, — лугьузва Бахтияр Алирзаева.

Октай Алирзаевахъ кьве хвани кьве хтул ава. ЧIехи хва Вадим прог­раммист я, гъвечIи хва Георгия мектебда кIелзава.

Мукьвара хайи югъ къейд авур бажарагълу художникдихъ къуй мягькем сагъламвал, яратмишунрани мадни зурба агалкьунар хьурай!

Куругъли Ферзалиев