Махачкъалада, Н.Юсупован тIварунихъ галай аялрин библиотекада, лезги чIалал “Лезги литературадин чIехи гъетер” лишандик кваз, тир Етим Эминан ва Дагъустандин халкьдин шаир Шагь-Эмир Мурадован яратмишунрин ирсиниз ва абурун уьмуьрдин рекьериз бахшнавай мярекат кьиле фена. Ам тешкилайбур гьа и библиотекадин коллектив (кьилин библиотекарь Марина Атлуханова), меркездин 48, 53-нумрайрин юкьван школайра лезги чIал чирзавай аялар тир (муаллимар — Алимат Баламирзаева, Исмира Ибрагьимова ва Маина Керимова).
Аялрихъ галаз гуьруьшмиш жез, чIехи шаиррин ирсиникай суьгьбетар ийиз, иниз шаир, гьикаятчи, драматург, Дагъустандин халкьдин писатель, “Самур” журналдин жавабдар редактор Абдуселим Исмаиловаз, шаир ва публицист, РФ-дин ва РД-дин культурадин лайихлу работник, “Лезги газетдин” редакциядин литературадин отделдин редактор Мердали Жалиловаз теклифнавай. Мярекат лентиниз къачуз, “Дагъустан” РГВК-дин милли телепрограммайрин директор, Дагъустандин халкьдин артист Исамудин Агьмедов вичин куьмекчиярни галаз атанвай.
Библиотекадин кIелунрин залда чIехи шаиррин яратмишунриз талукьарнавай метлеблу стендар гьазурнавай, ктабар, газетар, журналар кIелдайбуруз аквадайвал эцигнавай.
Ина ачух экрандилай шаиррин хайи маканриз талукь видеороликар (документрин бинедаллаз туькIуьрнавай фильмаяр) къалурунихъ галаз сад хьиз, чи устадри тамамарзавай, лентиниз къачунвай хейлин манийрихъни яб акална.
Виридалайни итижлуди шегьердин аялри лезги чIалал Етим Эминанни Шагь-Эмир Мурадован эсерар хуралай таъсирдайвал кIелун хьана. Хайи чIалан девлетлувал, гуьзелвал, чIехи мумкинвилер аялри аннамишун патал муаллимри хейлин кIвалах тухванвайди чир жезвай.
Мярекатдиз теклифнавай мугьманрикай А.Исмаилова Етим Эминан ирсинин гуьгъуьна вичи чIугур зегьметрикай, шаирдин хайиди тир Ялцугърин хуьре адан сур жагъур хъувуна, анал цIийи къванер хкаж хъувуникай, Эминхуьре шаирдиз зурба памятник хкажунин тарихдикай, гила ана музей эцигзавай тегьеррикай суьгьбетна, шаирдин бязи эсерар кIелна.
М.Жалилова вичиз Шагь-Эмир Мурадов гьикI чир хьайиди ятIа, шаирди лезги литература, культура, печать вилик финик кутунвай зурба паюникай, адан чIехи ирсиникай суьгьбетна, бязи шиирар ва вичи шаирдин 80 йисан юбилейдиз бахшна кхьей тебрик кIелна.
Аялри ва муаллимри а суьгьбетар ва кIелай эсерар хушвилелди кьабулна.
Мярекатдин эхирдай мугьманри библиотекадиз ва аялриз, савкьатар яз, чпин цIийи ктабар, “Самур” журналдин нумраяр багъишна, ахпа санал шикилар яна.
Мярекатдай репортаж лезги чIалал “Вахтар ва инсанар” телепрограммадай къалурда.
М.Хабаров
