Сулейман-Стальский райондин администрацияда райондин кьил Нариман Абдулмуталибов РД-дин шахматрин федерациядин руководитель Жакай Жакаевахъ галаз гуьруьшмиш хьана. Ана гьакIни райондин собранидин председатель Штибег Мегьамедханова, райадминистрациядин са жерге къурулушрин руководителри, Махачкъала шегьердин “Олимп” ДЮСШ-дин директор Вадим Зиятханова, РД-дин шахматрин рекьяй судебный коллегиядин председатель Зураб Салманова, райондин массовый информациядин такьатрин векилри иштиракна. Гуьруьшдал районда шахматрин спорт вилик тухунин месэлаяр веревирдна.
Къейд авун лазим я хьи, эхиримжи йисара районда шахматрин спортдиз екедаказ фикир гузва. ИкI, школайра гъвечIи классра шахматрин тарсар, школьникрин арада гьар йисуз шахматрайни шашкайрай турнирар тухузва. Идакай Нариман Абдулмуталибова республикадин меркездай атанвай мугьманар хабардарна.
— Заз чи аялри шахматрай хъсан нетижаяр къалурна кIанзава, — лагьана Н.Абдулмуталибова. — ГьикI лагьайтIа, шахматар менфятлу спорт я. Шахматри аялрин кьатIунар, абур тарсарай агакьунин кIвалах хъсанарзава. Гьам жаванрин, гьам чIехибурун арада чахъ хъсан шахматистар ава. Алай йисуз чна районда важиблу кьве мярекат — Дагъустандин халкьдин шаир СтIал Сулейманан 150 йис ва райондин 90 йис тамам хьун къейдда. Абурун сергьятра аваз чаз школьникрин арада шахматрай турнир тухуз кIанзава. Важиблу и серенжем патал меценат, чи баркаллу районэгьли Зураб Шайдаев пулдин такьатралди куьмек гуз гьазур я. И карда чаз Дагъустандин шахматрин федерациядин ва кьилди куь, гьуьрметлу Жакай Жакаев, куьмек ва тежриба герек я, — къейдна райондин кьили.
Вичин рахунра Ж.Жакаева райондиз атун теклифунай, хушвилелди кьабулунай Нариман Абдулмуталибоваз чухсагъул лагьана.
— Дагъустан шахматрин спорт вилик финай эхиримжи йисара Россияда кIвенкIвечи регионрик акатзава, — къейдна мугьманди. — Республикада шахматриз ийизвай итиж артух жезва. Ида чак шадвални кутазва. Махачкъалада Анатолий Карпован тIварунихъ галай шахматрин школа кардик ква. Чна, маса регионрин векилрин иштираквал аваз ва машгьур спортсменриз — шахматистриз теклифна, шахматрай чIехи дережадин турнирар тухузва. Абурукай яз завай Расул Гьамзатов рикIера хуьнин, “Белая ладья” — Вирироссиядин турниррин, Дагъустан Республикадин кIвенкIвечивал патал тухузвай ва маса турниррин тIварар кьаз жеда. Чна кIевелай инанмишвал ийизва хьи, республикада тухузвай турнирра гила Сулейман-Стальский райондин шахматистрини иштиракда. Шахматар вилик тухуник пай кутазвай Зураб Шайдаев хьтин меценат хьунални чавай дамах ийиз жеда.
Жуьреба-жуьре теклифар ва меслятар гваз гуьруьшдал райондин Собранидин председатель Штибег Мегьамедханов, физический культурадин, спортдин, туризмдин ва жегьилрин крарин рекьяй комитетдин директор Надыр Эфендиев, образованидин управленидин начальник Къачабег Аминов, дяведин, зегьметдин ветеранрин советдин председатель, насигьатчи, шахматрал рикI алай Абдулаким Гьажимурадов рахана.
Н.Абдулмуталибова райондин са ДЮСШ-да шахматрай тренер-преподаватель тайинарунин, шахматрин спорт вилик тухудай центр арадал гъунин, республикадин турнирра иштиракдай шахматистрин умуми команда тешкилунин месэлаяр къарагъарна. Мярекатдин иштиракчийри и теклифрин тереф хвена.
Хазран Кьасумов
