Са тIимил вахт идалай вилик “FFPromotion8” тIвар алаз какахьай женгерай кьиле фейи международный турнирда чи ватанэгьли Алим Зумрудинович Саидова Туьркиядай тир Икрам Афлатован винел гъалибвал къачуна.
Алим 1993-йисуз Докъузпара райондин Усугъчай хуьре дидедиз хьана. Ина мектеб ва гуьгъуьнлай Дербент шегьерда вуздин физкультурадин факультет куьтягьна. ГъвечIи чIавалай ам вичин ими, ДЮСШ-дин тренер Жабир Саидован гъилик спортдал машгъул хьана. Гуьгъуьнлай усугъчайви тренер Фахрудин Сулейманован гъилик азаддиз кьуршахар кьунин сирерни чирна.
Къейдна кIанда, Алима алай йисан 20-январдиз Москвада спортдин какахьай жуьредин женгерай (ММА) “Женгчидин рехъ” лишандик кваз кьиле фейи акъажунрани иштиракнай. И турнирда кьиле тухвай пуд бягьсинани Алима гъалибвал къачуна.
26 йисан яшда авай Алим Саидовахъ спортдин жуьреба-жуьре акъажунра къазанмишнавай 50-далайни гзаф медалар, грамотаяр ава. 2018-йисан февралдилай ам Москвада яшамиш ва спортдал машгъул жезва. Алакьунар авай викIегь спортсмен Москвада Росгвардиядиз кьабулнава.
Нубатдин бягьс ада 3-мартдиз Дербент шегьерда кьиле тухуда. Къуй адахъ гележегдани анжах гъалибвилер хьурай!
Куругъли Ферзалиев
