Дуьньяда вишералди халкьар, миллетар ава, амма вирибуруз чпин кьилдин пачагьлугъар, республикаяр хьанач. Жуьреба-жуьре себебриз, шартIариз, девиррин гьалариз килигна, хейлин миллетар маса пачагьлугърин къаюмвилик акатна. Дуьньядин тарихдай аквазвайвал, инсанди, халкьари гьамиша азадвилихъ еримишна, амма и азадвал, аслу туширвал, бубадилай къвезвай ирс хьиз, регьятдиз гъиле гьатзавай эменни тушир. Азадвал патал датIана дявеярни кьиле физвай. Гьа са вахтунда дявейрик къуншийрин чилер кьун, маса халкьар муьтIуьгъарун, абурун девлетрин иесивал авун патални цIай кутазвай. Мисалар кIамай кьван ава.
Чилерал лап зурба пара империяр, пачагьлугъар хьана, амма къе абур амач. Абурун чкадал маса государствояр, республикаяр арадал атана. Чаз лап хъсандиз чизвай Советрин Союзни чкIурна.
Хейлин политикри, тарихчийри гьисабзавайвал, ам чукIунин бине КПСС-дин ЦК-дин Генеральный секретарь Никита Хрущева кутуна. “Культ личности” русвагьдай амалралди ада государстводин къурулушда чIехи къуллугъар авур, уьлкве вилик фин патал еке зегьметар чIугур ксариз кар кьуна. Ихьтин сиясатдин нетижада СССР-дивай Китай, Югославия къерех хьана. Венгрияда, Чехословакияда халкьар бунтариз экъечIна.
1956-1958-йисара Н.Хрущева Крым — Украинадив, Ставрополдин крайдик квай Наурский ва Шелковский районар Чечено-Ингушетиядин Республикадив вахкана. Гьа и жуьредин къарарар ада мадни кьабулна. Къе абуру гьи терефдихъай ванзаватIа, чаз ачухдиз аквазва.
Гзаф миллетрикай ибарат государство идара авун, вири халкьар разивилел гъидай сиясат тухун, гьар са региондиз, халкьдиз вилик фидай, хъсандиз яшамиш жедай шартIар тешкилун регьят кар туш. Гьавиляй ара-ара гъавурда такьур, къизгъинвилерал гъизвай дуьшуьшарни жезва.
Государстводи тухузвай сиясатдал нарази инсанар гьамиша авайди я. Амма вичин милли истемишунар кьилиз акъуд лугьуз, яракь гъилеваз гьукумдиз акси экъечIун гьар кткана жезвай крар туш. Гьелбетда, алатай асиррин тарихдай аквазвайвал, ахьтин бунтар садрани аксибурун хийирдиз акъатнач.
Алай вахтунда гзафбуруз малум делил я, США-дин, РагъакIидай патан капитализмдин уьлквейрин сиясатдин къурулушри, институтри Советрин Союз чукIурун патал йисаралди кIвалахна. Абурун алчах мурадар кьилизни акъатна. Чи уьлкведин кьилиз атай Горбачев, Ельцин хьтинбурун хаинвилин гьерекатар себеб яз. Исятда ислягь уьлквейра къал тваз, абурал чпин къайдаяр, истемишунар илитIиз кIанзавайбур кими жезвач. “Чна демократия, лукIвиле авай инсанриз азадвал гузвайди я” лугьуз, США-ди ва адан гъилибанри гьихьтин алчах сиясат тухузватIа, чаз вилералди аквазва. Афгъанистан, Ирак, Ливия, Сирия, Украина… тIимил акуна, гила ислягь ва жуьрэтлу Венесуэладал гьавалат хьанва. Ультиматумар малумарзава. Халкьди сесер гана хкянавай президентдиз къуллугъдилай квахь лугьузва. Анал чпин, чпиз къуллугъдай итим эцигда, тахьайтIа, уьлкведиз кьушунар рекье твада лугьузва. Ингье, гьихьтин демократиядин, азадвилерин иесияр ятIа вири дуьньядин агъавал ийиз кIанзавайбур. Чкадин, гражданвилин дявеяр къурмишнавай уьлквейра рекьизвай агъзурралди инсанар абуруз тIветIверайни туш.
Ихьтин законсуз, инсансузвилин сиясатдиз акси акъваззавай Россиядин Федерациядихъ галазни абур бягьсина ава. Советрин Союз хьиз, Россияни чукIуриз кIанзавай планар кьилиз акъат тавурла, гила чи уьлкве гьар са камуна кIеве тваз алахънава. Абуру, винидихъ тIварар кьунвай уьлквейра хьиз, чи государстводин къенепатани чпин чIуру мурадар кьилиз акъудиз куьмек гузвай хаинар жагъурзава. Абурукай садбур къецепатан уьлквейриз катнаватIани, хейлинбуру чинеба кIвалах гилани тухузва.
1990-йисарин эхирра Кеферпатан Кавказда дяведин гьалар арадал гъуникни гьа “хахайрин” пай ква. Гъиликни Чечен Республика къачуна. Хъсандиз чизвай хьи, ина гьукумдилай наразибур, садалайни аслу тушир кьилдин государство тешкилдай фикирдал алайбур гзаф я, гьавиляй дяведикни цIай кутаз жеда.
Гьеле 1930-йисарин юкьвара Дондал алай Ростовда дидедиз хьайи ва ахпа бубайрин ватандиз хтай писатель Хасан Исраилова Чечен Республика Союздикай хкуддай алахъунар авунай. Кьве сеферда дустагъра гьатай и кас вичин фикирдал пара кIеви тир. 1940-йисуз ам, вичи кIватIнавай дестеярни галаз, яракь гъилеваз Союздин гьукумдиз акси экъечIна. Ада умуднавай хьи, вичин тереф Кеферпатан Кавказдин республикайрин халкьарини хуьда. Исраиловаз, Германиядин империядин мандат гваз, Кавказдин халкьарин Федеративный Республика тешкилиз кIанзавай. И кар себеб яз Иосиф Сталина чеченвияр, гьабурук акатна, ингушар, кабардинар, балкарар ва маса халкьарни Къазахстандиз, Къиргъизистандиз, Узбекистандиз акъуднай.
Чечен Республикада Исраилован фикирар рикIера хуьзвайбур амай кьван! Абурук государстводин кьилиз атанвай Ельцинан “квевай иливариз жедай кьван аслу туширвал, кьилдинвал къачу” лугьудай гафари мадни гьевес кутуна. Джохар Дудаева Чечено-Ингушетиядин чкадал Чечен Республика-Ичкерия тешкилнавайдан гьакъиндай малумарна, Россиядин Федерациядин гьукуматди ам тестикьарначтIани. Ахпа къецепатай къвезвай ва Россиядин бязи политикри гузвай пулари кьил элкъуьрнавай Дудаеван, З.Яндарбиеван, А.Масхадован, Д.Умарован, Ш.Басаеван гьукумдиз акси гьерекатар себеб яз, Чечнядин халкьдин кьилел дяведин тупари къукърумарна. Са тахсирни квачир вишералди ислягь инсанар телеф, кIваливай-къавай хьана.
Мусибатдин гьа вакъиаярни тарихдиз фена. Россиядин Президент В.Путинан алахъунар себеб яз, къе государстводи пайгардик кваз виликди камар къачузва. Гьайиф хьи, чи уьлкведин агалкьунри бязибурук ажугъ кутазва. Иллаки чпин алчах планар кьилиз акъат тийиз акурла. Россиядин халкьарин арада дуствилин, стхавилин алакъаяр авайла. Милли республикайри ва вири регионри экономика, яшайиш, культура вилик тухудайла. РагъакIидай патан уьлквейрин сиясатчийри мадни чпин чIулав фикирар, ниятар кьилиз акъуддай планар язава, абур чи уьлкведин халкьар сад-садал гьалдардай ва ахпа Россияни чукIурдай рекьерихъ, чпин гафуна гьатдай “аскеррихъ” къекъвезва.
Уьмуьрдай ва тарихдай аквазвайвал, къуншийрин, хуьрерин, пачагьлугърин арада кьиле фейи къал-макъалар, къизгъинвилер, дявеяр гзаф вахтара чилерихъ галаз алакъалу хьана. Чилерин месэла гьамиша муракабди, кьве терефни рази жедайвал гьялун четин акъваззавайди я. Къе чилерин, картайрин, кьилди хьунин месэлаяр кудун хаталу я. Гьуьлерилай анихъ галай къалп демократиядин, азадвилерин “сагьибдарар” Россиядин регионрин, халкьарин арайра чуьруькар хьунал вил алаз акъвазнава, ахпа “Кавказдани чи итижар авайди я” лугьудайвал.
Аквазвайвал, Россиядин Федерацияда ихьтин хци ва маса месэлайриз США-ди ва РагъакIидай патан бязи уьлквейри рум гузвайди, ам кIеве тваз алахънавайди рикIелай алудна виже къведач.. Гьа са вах-тунда къецепатан “дустари”, Кеферпатан Кавказдин халкьарик секинсузвал кутазвай месэлаяр авайди фикирда кьуна, абурук мадни къизгъинвал кутадай меслятар гузва. Чизва хьи, эгер дагъви халкьар, казакар сад-садан къаршидиз экъечIайтIа, дяведин гьерекатризни рехъ ачух, кьилдинвал, аслу туширвал кIанзавай халкьариз гуя куьмекдин гъил яргъи ийизвайди я лугьуникай далда кьуна, къаришмиш хьунин мумкинвални жеда.
Россия тахьай мисал ийиз кIанзавайбуру алахъунар гзаф ийизва. Абуруз чпин мурадар кьилиз акъудун патал Юкьван Азиядин республикайра, Белоруссиядани “хъипи” инкъилабар арадал гъиз кIанзавай, амма кьиле фенач. Анжах Украинадин властдин кьилиз гужуналди, ивияр экъичуналди атайбуру США-дин регъуьхъ яд язава. Россиядин церин сергьятра ихтиярсуздаказ гьахьай гимийри ва Украинада дяведин гьалар малумаруни душманрин къастарикай ачухдиз лугьузва. Халкьар сад-садал гьалдариз, чпин крар туькIуьрзавайбурун “аскерар” тежен.
Россиядин халкьар, республикаяр, регионар сад хьана, гъил-гъиле вугана, абадвилихъ фена кIандай чкадал картаяр дегишаруни, сергьятрин, чилерин гьакъиндай гьуьжетар авуни, кьилдин республикаяр тешкилун истемишуни са халкьдин крарни туькIуьрдач, муракаб месэлаяр гьялизни куьмек гудач.
Нариман Ибрагьимов