РД-дин Кьилин ва Гьукуматдин Администрациядин пресс-къуллугъди хабар гайивал, Дагъустандин Гьукуматда Росгвардияда ва Каспийскдин флотилияда къуллугъзавайбуруз яшайишдин кIвалер эцигун патал Каспийскдинни Махачкъаладин сергьятра авай азад ва хийирлудаказ менфят къачун тийизвай чилер желб авуниз талукь месэлаяр веревирдна.
Республикадин премьер-министр Артем Здунова къейд авурвал, Росгвардияда ва Каспийскдин флотилияда къуллугъзавайбур патал тайинарнавай вахтунда яшайишдин кIвалер эцигунин месэла кьетIен гуьзчивилик кутунва. “Месэла тек са кIвалер эцигуналди акьалтIдач. Абурун мукьварив мектеб, поликлиника, ясли-бахчаяр ва яшайишдин маса объектарни кардик кутада. Военный къуллугъчияр патал вири жуьредин къулайвилер тешкилун республикадин везифа я”, — лагьана Артем Здунова.
РикIел хкин, алатай йисан апрелдин вацран эвел кьилера РФ-дин оборонадин министр Сергей Шойгуди Каспийскдин флотилия Астрахандай Дагъустандиз акъудзавайдакай хабар ганай. 2020-йисан эхирралди Дагъларин уьлкведа флотилиядиз талукь вири объектар эцигна акьалтIарун пландик кутунва.
«Лезги газет»
