8-февралдиз Дагъустандиз мугьманвилиз атанвай Россиядин Федерациядин экономикадин жигьетдай вилик финин министр Максим Орешкин Азербай­жан­дин экономикадин министр Шахин Мус­та­фаевахъ ва Дагъустан Республикадин Кьил­ Владимир Васильевахъ га­лаз­ санал автомобилар ахъайдай “Ярагъ­-Къаз­маяр” пунктуниз килигна, адан кIва­лах­дихъ галаз таниш хьана. Ина “Каспий”-  Упрдор федеральный казенный идарадин начальникдин заместитель Сергей Улеева федеральный министрдиз Россиядинни Азербайжандин сергьятдал автомобилрин муьгъ эцигунин кIвалахар кьиле физвай гьалдикай суьгьбетна. Самур вацIал и муьгъ дуствилин кьве уьлкведин арада транспортдин дуьзгуьн ала­къа  хуьнин мурадралди эцигзавайди я. Имарат 2019-йисан ноябрдиз ишлемишиз вахкудайвал я.

“ЦIийи муьгъ туькIуьруникди кьве терефдихъни ахъайзавай улакьрин кьадар хейлин артухардай мумкинвал жеда”, — инанмишвал къалурна С.Улеева.

Ада мадни малумарайвал, алай вахтунда имарат гьазурвилин дережади 59 процент тешкилзава: “Азербайжандин мулкунал муькъуьн вири даяхар акIуру­нин кIвалахар тамамарнава, Россиядин терефдихъай лагьайтIа, арматурадин каркасар кардик кутунин кIвалахар кьиле тухузва”, — алава хъувуна ада.

“Каспий”-Упрдор ФКУ-дин начальникдин гафаралди, Самур вацIалай тухузвай муькъвелай гьар са терефдихъ кьве зул аваз автотранспортдин гьерекат тешкилда­. Рекьера улакьрин кьадар иллаки гзаф хьайи сятера пуд лагьай зулни кардик кутаз жеда. Самур вацIалай тухузвай муькъуьн яргъивал 325,3 метрдив, гьяркьуьвал 17,5 метрдив агакьда. Муьгъ туь­кIуь­ру­нин проект 2013-йисан августдиз Россиядинни Азербайжандин гьукуматри къулар чIугунвай Икьрардин бинедаллаз кьилиз акъудзава.

РФ-дин экономикадин жигьетдай вилик финин министрди къейд авурвал, Азербайжандайни Ирандай Россиядиз дашмишзавай парарин кьадар къвердавай артух жезвайди фикирда кьурла, имаратдихъ стратегиядин жигьетдай важиблу метлеб жеда.

Максим Орешкин сергьятдилай ахъай­­дай “Ярагъ-Къазмаяр” пункт цIийикIа туь­кIуьр хъувунин ва кьве уьлкведин сергьят­дал “Самур” ППП-дин кIвалахар тадаракламишун  кьиле физвай гьалдихъ галазни  таниш хьана.

Мугьманрихъ РД-дин Гьукуматдин Председатель Артем Здунов, Азербайжан Республикада Россиядин Федерациядин Чрезвычайный ва Полномоченный посол Михаил Бочарников, РФ-да Азербайжан Республикадин посол Полад Бюлбюл огълы, Кеферпатан Кавказдин крарин­ рекьяй РФ-дин министрдин заместитель Ольга Рухуллаева ва маса ксар галай­.

* * *

Гьа и юкъуз Россиядин экономикадин жигьетдай вилик финин министр Максим Орешкин ва Азербайжан Республикадин экономикадин министр Шахин Мустафаев, Дагъустан Республикадин Кьил Владимир Васильевахъ галаз санал Дербент­да Нарын-къеледизни фена. Абурухъ га­лаз­ санал и имаратдиз РД-дин Гьукуматдин Председатель Артем Здунов, Рос­сия­дин Федерацияда Азербайжан Республикадин посол Бюлбюл огълы, Азербайжанда Россиядин Чрезвычайный ва Полномоченный посол Михаил Бочар­ников, Кеферпатан Кавказдин крарин рекьяй­ РФ-дин министрдин заместитель Ольга Рухуллаева, Дербент шегьердин кьил Хизри Абакаров ва маса ксарни килигна.

Дербентдин музейдин — заповедникдин директор Али Ибрагьимова ЮНЕСКО-дин виридуьньядин ирсинин сиягьдик акатзавай Нарын-къеледа мугьманриз гъвечIи сиягьатни тешкилна.

Идалайни гъейри, гьуьрметлу мугьманриз  Дербентдин юбилейдиз талукьарнавай рикIел аламукьдай ракьун пул атIудай мумкинвални гана.

* * *

8-февралдиз  Дербент шегьердин администрацияда Россиядин Федерациядин экономикадин жигьетдай вилик финин министр Максим Орешкинан ва Дагъустан Республикадин Кьил Владимир Васильеван регьбервилик кваз республика вилик тухунин лап важиблу месэлайрай ведомствойрин уртах совещание кьиле фена.

Ана РФ-дин экономикадин жигьетдай вилик финин министрдин заместитель Азер Талыбова, РФ-дин транспортдин ми­нистрдин заместитель Николай Захряпина, Кеферпатан Кавказдин крарин рекьяй РФ-дин министрдин заместитель Ольга Рухуллаевади, СКФО-да РФ-дин Президентдин патай тамам ихтиярар ганвай Векилдин куьмекчи Николай Дорожкоди, РФ-дин экономикадин жигьетдай вилик финин министерстводин СНГ-дин уьлквейрихъ галаз экономикадин жигьетдай санал кIвалахунин ва Евразиядин интеграция гегьеншарунин  Департаментдин директор Рафаэл Абрамина, РФ-дин эко­но­микадин жигьетдай вилик финин министерстводин регионар вилик тухунин Департаментдин директор Игорь Егорова, Дербент шегьердин кьил Хизри Абакарова ва жавабдар къуллугърал алай маса ксари иштиракна.

Совещанидал республика яшайишдинни экономикадин жигьетдай вилик тухунин лап важиблу, гьа гьисабдай, сер­гьят­рин патарив герек тир къурулушар ара-дал гъуниз ва туризм вилик тухуниз талукь месэлаяр веревирдна.

«Лезги газет»