И йикъара Белиж поселокда РД-дин Кьиблепатан зонадин кIвенкIвечивал патал 2005-2006-йисара дидедиз хьайи жегьил спортсменрин арада боксдай акъажунар кьиле фена. Идакай «Лезги газетдиз» Сулейман-Стальский райондин администрациядин пресс-къуллугъди хабар гузва.
Грэпплингдай дуьньядин чемпион Явер Межидован призар къачун патал тешкилай спортдин мярекатдин макьсадар сагълам уьмуьрдин таблигъат тухун, жегьилрин арада бокс машгьурун ва РД-дин кIвенкIвечивал патал кьиле фидай акъажунриз викIегь боксерар хкягъун тир.
Акъажунра Кьиблепатан Дагъустандин районрай 114 спортсменди (18 хкягъай командади) иштиракна. Сулейман-Стальский райондин физкультурадин, спортдин, туризмдин ва жегьилрин крарин рекьяй комитетди тIвар кьунвай акъажунриз 6 спортсмендикай ибарат команда ракъурнавай. Нетижада КIварчагърин хуьре тренер Альберт Межидован регьбервилик спортдал машгъул жезвай Абумислим Гереева, Мирземегьамед Абдулвагьабова, Абдулазим Меликова 1-чкаяр кьуна. Майбуллагь Алиагьмедоваз 2-чка хьана. Тренер Роберт Нагъиеван регьбервилик боксдал машгъул Шагьабудин Мирзебутаева ва Амин Таибовани акъажунра гъалибвал къачуна. Гъалибчиярни приздин сагьибар медалралди, грамотайралди ва кубокралди къейдна. Лап хъсан боксерриз махсус пишкешарни гана. Турнирдин нетижада Абдулазим Меликов лап хъсан боксер яз гьисабна.
«Лезги газет»
