11-февралдиз Мегьарамдхуьруьн райондин администрацияда райондин кьилин заместитель Ариф Гьажиева райадминистрациядин къурулушрин, отделрин жавабдар къуллугъчийрихъ галаз аппаратдин совещание кьиле тухвана. Идакай «Лезги газетдиз» райондин администрациядин пресс-къуллугъди хабар гузва.

Нубатдин совещание шад вакъиадилай гатIунна. Райондин кьил Фарид Агьмедован тапшуругъдалди МР-дин архивдин отделдин пешекар Муслимат Яралиева «Мегьарамдхуьруьн район вилик тухунин кардик пай кутунай» лишандалди къейдна. Тебрикдин гафар лугьуналди, награда МР-дин кьилин заместителар тир Ариф Гьажиевани Марат Абдуллаева вахкана.

Гуьгъуьнлай совещанидин иштиракчияр вилик акъвазнавай месэлаяр веревирд ийиз эгечIна. Сифте нубатда алатай гьафтеда къарагъарай месэлайриз талукь яз тухвай кIвалахрин нетижаяр кьуна. Малум хьайивал, райондин кьил Ф.Агьмедова, Советрин кьушунар Афгъанистандай ахкъудайдалай кьулухъ 30 йис тамам хьунихъ галаз алакъалу мярекатар тухун ва миллетрин арада авай рафтарвилер мягькемарун патал махсус «Чи къуват садвиле ава» план тестикьарнава.

«Лезги газет»