Мукьвара Сулейман-Стальский райондин администрациядин образованидин управлениди государстводин федеральный образованидин уьлчмейрай 4-классдин математикадин, 9-10-классрин астрономиядин ва 9-11-классрин информатикадин ктабар къачуна. 2-3-классрин аялриз жуьреба-жуьре предметрай 125 учебник гана. Ингилис чIалай, гьакIни бес тежезвай 9-11-классрин урус чIалан, 10-классдин урус литературадин ва 9-11-классар патал Россиядин тарихдин учебникар хтун гуьзлемишзава.
Райондин образованидин управленидин методист Селимат Алимовади чаз лагьайвал, РУО-диз “Просвещение” издательстводин учебникрин тамам комплектар хтанва. Мукьвал вахтара “Рифма”, “Дрофа”, “Русское слово” издательствойрин учебникар хтун гуьзлемишзава.
Виликдай райондин школайрин 8-классра кIелзавайбур герек учебникралди таъминарнай. Вири санлай 2925 ктаб (информатикадай, урус чIалай ва литературадай) хтанай.
Санлай къачурла, 2018-йисуз райондиз РД-дин образованидин ва илимдин министерстводай 35706 учебник хтана. И йикъара учебникар школьникрал агакьарда.
Хазран Кьасумов
