Школада хъсан чирвилер ва тербия гудай, чIехи-гъвечIи чирдай, акьалтзавай несил кIелунал, ктабрал ва хъсан крарал ашукьариз алакьдай халис муаллимрал ацалтун гьар са аялдин бахтлувал я.
Хкемрин тамам тушир юкьван школадин коллективдани чпиз ихьтин ерияр хас педагогар авачиз туш. Мая муаллимни ахьтинбурукай сад я. М.Гьажиевадин рикIе гьеле Ахцегьрин 2-нумрадин юкьван школада кIелзавай йисарилай муаллим хьунин мурад авай.
1983-йисуз Ахцегьрин 2-нумрадин школа лап хъсан къиметралди куьтягьай Мая Гьажиева ДГПИ-дин филологиядин факультетдик заочнидаказ экечIна ва и вуз агалкьунралди куьтягьна. 1989-йисалай ада Авадан хуьруьн юкьван школада старший пионервожатыйвиле кIвалахиз эгечIна. Ина Маяди ругуд йисуз зегьмет чIугуна. Гуьгъуьнлай ам Хкемрин школадиз ракъурна. Жегьил пешекарди, кIвалахдив эгечIай сифте йикъалай башламишна, вичин вилик аялриз дерин чирвилер гунин везифа эцигна.
— Муаллимвал четин ва жавабдар пешейрикай сад я, — лугьузва педагогди. — ГьикI лагьайтIа, ина гьиллейриз эсиллагь рехъ гана виже къведач. Диде-бубайрихъ галаз мукьвал-мукьвал гуьруьшмиш хьана, абур аялрин агалкьунрикай, чпел гьеле кIвалах хъувун лазим тир те-рефрикай, абурун низамдикай хабардарна кIанда. КIвалахдин тежрибани йисаралди кIватIзавайди я.
Дидед чIалан ва литературадин муаллим тир М.Гьажиевади ара-ара чи шаиррин юбилейриз талукь мярекатар, зегьметдин ветеранрихъ галаз гуьруьшар кьиле тухузва. Чи райондай тир шаиррин фотомонтажар туькIуьрнава. Аялар дидед чIалал кьару авунин мураддалди “Халкьдин мисалар”, “Дидед чIалан югъ” тарсар кьиле тухузва. М.Гьажиевадин ученикри хайи чIалаз талукь цлан газетни акъудзава.
Педагогди аялар сиягьатризни тухузва. Са кьадар вахт идалай вилик аялрин десте муаллимдихъ галаз Дербентдин Нарын-къеледиз килигиз фена. Кьилин категориядин муаллим М.Гьажиевади тарс гузвай хейлин аялри хъсан ва лап хъсан къиметралди кIелзава.
Рагьидин Эминов
