Бязи вахтара рекьери чаз садрани такур, амма гьа акур макъамдилай рикIе гьуьрметлу чка кьадай инсанрал гьалтдай мумкинвал гуда.
Гьейран жезвайди а кар я хьи, инсанди, вичин уьмуьрдин жегьил йисарин чIехи пай (23 йис) са кардиз багъишнаваз, а кардивай, месела, илимдин ахтармишунривай, мад чара хъжедач лугьудай чIавуз, вичизни гьеле ачух тахьанвай патахъ рехъ (кьисмет) дегишарда!
И йикъара чун гьахьтин касдал дуьшуьш хьана. Ам виликан геофизик, РАН-дин ДНЦ-дин геотермиядин месэлайрин рекьяй Институтдин къуллугъчи, илимрин кандидат, республикадин меркезда кIвал-югъ кутуна, хизан галаз яшамиш жезвайди, садлагьана динж чкани, хкянавай пешени дегишарна, медицинадин хилез фена, инсанар патал диагностикадинни азаррихъ галаз женг чIугунин, сагъламвал мягькемарунин вири мумкинвилер авай махсус центр эцигна, кардик кутунвай чи аямдин карчи-меценат, гьа и цIийи хиле вичин вахтунин, такьатрин гьайиф текъвезвай, авунвай цIийи кардал кIевелай рази тир кьегьал хва Къази Сардарович Къазиев (шикилда) я.
Аламатдин инсан туш ни лугьуда! Ада вичин са интервьюда журналистдиз хъсан жаваб ганва: “Метлебар, мурадар вилик эцигун — хъсан кар, абур кьилиз акъудун — мадни хъсан кар я!”
И жавабда ада вичин кьисметдилай къалурзавай разивални ава. Куьне лугьуда: геофизикдин медицинадихъ галаз вуч алакъа авайди я?
Къази Сардаровича вичи и кардиз икI баян гузва: — СССР хьтин зурба государство чкIурайдалай кьулухъ вирибурал залан имтигьанар ацалтна. Иллаки илимдинни культурадин хилерин векилрал. Илимдин гзаф къуллугъчияр кьил хуьдай рекьер жагъуруниз мажбур хьана.
Гьа кьисмет зазни акъатна. Куьлуь пуд аял галай хизан хвена, илимдани чIехи кукIушрихъди фидай мумкинвал амукьнач. Саки кхьена куьтягьнавай докторвилин диссертация туна, зун бизнесдиз фена. Кьиблепатан Дагъустанда а чIавуз (1996-1997-йисар) “Южно-Уральская промышленная компания” (ЗАО ЮУПК) фирмадин филиал кардик квай. Ам Дербентда авай. Фирмадиз къаюмвал чи машгьур карчи Рашид Селимович Сардарова ийизвай. Ада Дербентдин ГНС жими авунвай газдалди таъминарзавай. Герек вахтунда герек чкадал хьун хъсан я лугьудайди хьиз, заз гьа чIавуз Дербентдин газдин станциядин директорвал авунин теклиф гана, за а кар кьилизни акъудна. Яваш-яваш, акуна-такуна гьа и цIийи къайгъуйри закай карчи дербентви авуна…
— Бес медицина гьикI рикIел акьалтна?
— Кьисметди гьа карни ачухна.
Ихьтин дуьшуьшди зун а рекьиз мукьва авуна. Са сеферда зи рушан иви ахтармишун герек хьана, чун Дербентдай Махачкъаладиз, Республикадин диагностикадин центрадиз атана. Амма кар туькIвенач, атайвал хъфена. И дуьшуьшди зун Дербентда медицинадин алай аямдин махсус центр “Сагъламвал” арадал гъунин ниятдал руьгьламишна ва са куьруь вахтунда, жуван вири такьатар, мумкинвилер кардик кутуна, гьуьлуьн кьере куьгьне са карханадин майданар маса къачуна, ана цIийи эцигунар гъиле кьуна!
Гила, ингье, а чка Кьиблепатан Дагъустанда машгьур хьанва. Ана гьар жуьре анализар авуна, дуьз диагноз эцигна, инсанриз чпин сагъламвал мягькемардай мумкинвал гузва. Къуллугъар пулдихъ ятIани, инаг чи халкьдиз мукьва я, пешекарарни лап хъсанбур хкянава. Саки вири чIехи меркезрин клиникайра, центрайра махсус чирвилер къачунвайбур я. Тежриба хкажзавайбур, чирвилерикай кичIе туширбур, гъилелни, ниятрални михьибур чна хкязава, кIвалахдал желбзава.
Гьахьтин цIийи тадаракарни ава, медицинадин рекьяй цIийи вуч аватIа, ам чна чи центрадиз гъизва.
— Ви кьисметдилай къе вун рази я, тушни?
— ГьикI бес?! Жуван чирвилер, алакьунар халкьдин рекье эцигунилай чIехи бахт ва кьисмет авайди туш. Сагъламвилелай чIехи вуч девлет ава?..
Къази Сардарович гьахълу я. Касдиз руьгь тухардай рехъ-инсанриз паквилелди къуллугъ авунай аквазва. Им чешне къачуниз лайихлу рехъ туш садани лугьудач.
И йикъара бажарагълу хци вичин 60 йисан юбилей къейдзава. И вакъиа адаз, вичин ярар-дустари хьиз, чнани тебрикзава:
Гафарганрай жагъизвач чаз алхишар,
Са гъетерихъ жеда ахьтин нехишар.
Аквазва чаз ашукь тирди алам вал,
Багъишзавайвиляй мерддиз сагъламвал.
Яшамиш хьухь, майданар це бахтариз.
ЦIийи тостар тикрарда ваз вахтари…
Мерд Али Жалилов, литературадин отделдин редактор
