Зегьметдин ветеранар тир Гьасанхан ва Мислимат Алихановрихъ Ахцегьа жемятдин арада гьуьрмет, авторитет ава. Ам абуру чпин хуш къилихралдини гьакъисагъ зегьметдалди къазанмишнава. Мукьвара абуру чпин саналди тир уьмуьрдин 60 йисан юбилей къейдда.
— Ватандин ЧIехи дяве башламишайла зи 6 йис тир, — суьгьбетзава Гьасанхан Алиханова. — А йисара зи бубади Усуррин хуьруьн Ленинан тIварунихъ галай колхозда гьар жуьредин кIвалахар тамамарзавай. ГъвечIи яшдизни килиг тавуна, зун бубадиз алакьдай куьмекар гуз чалишмиш жедай. Гьеле жаван яз, за цанар цаз, техилар кIватIиз, дагъдин уьруьшрай векьер ягъиз, арабайра аваз абур хкиз куьмекдай. Ахпа за МТФ-да гьар жуьредин кIвалахар тамамарна, колхоздин чубанвиле, ОТФ-дин заведующийвиле зегьмет чIугуна.
Колхоздин правлениди намуслу ва гьакъисагъ зегьметдай заз са шумудра чугъсагъулар малумарнай. Производстводин тапшуругъар гьамиша артухни алаз тамамарзавай за майишатдин зегьметчийрин арада тухузвай соцсоревнованийра кIвенкIвечи чкаяр кьадай. Гьавиляй зи шикилни колхоздин Гьуьрметдин доскадал жедай…
Луткунрин хуьруьн мектебда 6-класс куьтягьайдалай гуьгъуьниз, 1952-йисуз, Гь.Алиханов Бабаюрт райондин са колхоздиз кIвалахиз фена. 1954-йисуз армиядин жергейриз тухвай ам Румыниядиз акъатна. Чешнелудаказ къуллугъзавай жегьил сержантар гьазурзавай курсариз ракъурна. Сержантвилин чин гайи ам пулеметрин подразделенидин командирвиле тайинарна. Ам”лап хъсан лишанар ядайди” значокдиз лайихлу хьана. Хъсандиз къуллугъзавай Алихановаз старший сержантдин, гуьгъуьнлай старшинадин чин гана. Адан шикил полкунин частунин Гьуьрметдин доскадал алай.
Къазанмишнавай агалкьунрай адаз отпуск гана. Армиядин жергейра саки 3 йисуз чешнелудаказ къуллугъайдалай кьулухъ, 1957-йисуз, Гьасанхан хайи хуьруьз хтана. Кьве йисуз Усуррин хуьре туьквендин заведующийвиле кIвалахна. Мехъерарна, 1975-йисуз жегьил хизан Ахцегьиз куьч хьана. Ина ада Луткунрин хуьруьн Ленинан тIварунихъ галай, гьакIни “Заря” совхозрин ОТФ-дин заведующийвиле ва чубанвиле кIвалахна. 1961-йисуз ам КПСС-дин жергейриз кьабулна. А йисара адаз И.В.Сталинан 130 йисан юбилейдин медални ганай.
Гьасанханан уьмуьрдин юлдаш Мислиматани а йисара сифте “Заря”, гуьгъуьнлай Агъасиеван тIварунихъ галай майишатра зегьмет чIугуна. Ам са шумудра “Соцсоревнованидин кIвенкIвечи” лагьай лишанриз, пулдин премийриз ва гьуьрметдин грамотайриз лайихлу хьана. 1992-йисалай пенсиядиз экъечIнавай абуру лайихлудаказ ял язава. Чна гьуьрметлу ветеранриз саналди тир уьмуьрдин 60 йисан юбилей мубаракзава. Къуй Квехъ гележегдани чандин сагъвал, уьмуьрда хушбахтлувал хьурай!
Рагьидин Эминов
