Ажайиб агьвалат

ЦIуд йисуз вичин руш гуьзетиз рекьин ­сивел ацукьай Бангкокдай тир кьуьзуь касдикай Таиланддай тир военный къуллугъчиди Facebook соцсетда малуматар чапна.

Нисинин береда чкадин кафеда фу нез ацукьай Порамет Мисомфопа кьуьзуь инсандиз фикир гана. Ада рекьин къерехда авай аскIан цлал текдиз ацукьнавай яшлу кас яргъалди дикъетдик кутуна. Мисомфопа таниш тушир агьил вуж ятIа чирун кьетIна ва патарив гвай туьквенра адакай хабарар кьуна.

Малум хьайивал, рекьин къерехда, саки чкадилай масанихъ тефиз, кIвал авачир инсан ацукьна гзаф вахтар я. “РикIел алама, цIуд йис идалай вилик инлай рулдихъ руш галай машин фенай. Руша машин акъвазарна, анай кьуьзуь инсан авудна ва адаз са вуч ятIани лагьана. Амма руша адаз лагьай гафарай кьил акъудиз хьанач”, — ихтилатна чкадин агьалийри Мисомфопаз.

Гуьгъуьнлай кьуьзуьда туьквенда кIвалах­за­вай дишегьлидиз суьгьбетайвал, адан рушаз кIвалахар ийиз кIан хьана ва гьавиляй са кьадар вахтунда кьуьзуьди туна. Руш вичин патав хкведайдахъ инанмиш агьил касди ам сабурлувилелди вилив хуьзвай.

“Амма итим пакадин юкъузни гьа чкадал аламай”, — ихтилатна туьквендин къуллугъчиди. Арадал атай агьвалатдиз садани артух фикир ганач. Туьквенда кIвалахзавай дишегьлиди, гьуьрмет авунин лишан яз, яшлу касдиз недайди гуз хьана, исятдани адахъ гелкъуьн давамарзава.

Мисомфопаз таниш тушир а касдиз куьмек гуз кIан хьана. Кьуьзуьдан сивяй анжах кьве келима акъатна: “Ам мукьвара хкведа, ам мукьвара хкведа” ва “Анжах хъша вун”. Руш жагъурунин карда куьмек хьуник умуд кутуналди, Мисомфопа и ажайиб агьвалатдикай соцсетриз малуматар акъудна.

Куьмек тIалабдай ният ава

Залан Су-30МКИ истребителриз талукь яз Индиядиз Россиядихъ галаз цIийи икьрар ку­тIу­низ кIанзава. Идакай Индиядин Business Standard чешмеди хабар гузва.

ВВС-риз самолетар бес тежезвайвиляй Индиядиз Москвадивай мад сеферда са эскадрилья арадал гъунин карда куьмек тIалабдай ният ава. Къейдзавайвал, чи уьлкведин оборонадин министерстводи Индиядин HAI-див алава 18 истребитель кIватIун патал герек затIар, системаяр агакьарунин икьрардал къул чIугва­да.

Чешмеди къейдзавайвал, алава истребителар кIватIунив 2020-йисалай кьулухъ эгечIиз жеда. Алай вахтунда Индиядин ВВС-рихъ ихьтин 250-дав агакьна самолетар ава.

Мажибрикай магьрумда

Туьркменистандин вири вузар ва илимдин тешкилатар бюджетдай гузвай такьатрикай яваш-яваш магьрумда. Идакай Туьркменистандин гьукуматдин информагентстводи малумарзава.

И уьлкведин са университетда кьиле фейи конференциядал вузрин муаллимриз ва студентриз хабар гайивал, абур базардин шартIа-рихъ галаз вердиш хьуниз мажбур жеда. И кар патал государстводи абур бюджетдай гузвай пулдин такьатрикай магьрумардайвал я. Гила абуруз, къерехдай куьмек авачиз, чпин менфятралди кIвалах кьиле тухудай къайдаяр теклифзава.

Туьркменистандин гьукумдаррин фикирдалди, и карди илимдин ва образованидин идарайриз ресурсар метлебдив кьурвал ишлемишдай, бизнесдихъ ва инвесторрихъ галаз алакъа­лу яз кIвалахдай мумкинвал гуда. КIватI хьан­вайбуру цIийи тапшуругъар чIехи жавабдарвилелди, пешекарвилелди ва яратмишунин гьевесдивди кьилиз акъуддайди тестикьарна. Идалайни гъейри, малумарзавайвал, пуд йисан къене Туьркменистандин илимрин академияни бюджетдин такьатрикай тамамвилелди магьрум жеда.

Гьазурайди — Куругъли Ферзалиев