И йикъара Берикейдин спортшколада Дербент райондин кьилин призар патал мини-футболдай финалдин къугъунар кьиле фена.
Къугъунриз килигиз, Дербент райондин кьил Мегьамед Жалилов, РД-дин Халкьдин Собранидин депутат Ягья Гьажиев, райондин собранидин председатель Мажмутдин Семедов, кьилин заместителар Анвер Гьажимурадов, Сеидмегьамед Бабаев ва райондин администрациядин управленийринни отделрин руководителар атанвай.
Турнирда райондин школайрин 40 командади иштиракна.Чип вегьинин нетижада абур 10 дестедиз пайнавай. Кьилин приз патал анжах 2 командади къугъун давамарна.
Финалда сифте туп ядай ихтияр райондин кьил Мегьамед Жалиловаз гана, ада иштиракчийрихъ агалкьунар, гъалибвал хьун алхишна.
Турнирдин вири къугъунар къизгъиндаказ кьиле фена. Са командадизни кубок гъиляй ахъайиз кlанзавачир. Финалдин къугъунра Берикейдин командади Рубасдин командадал 5:2 гьисабдалди гъалибвал rъазанмишна. 3-чка Геджухдин СОШ-дин командади кьуна. Абуру Лукlарин СОШ-дин команда 8:4 гьисабдалди гуьгъуьна туна.
Кубок, медаларни савкьатар 1-чка кьур Берикейдин СОШ-дин чемпионрив Дербент райондин Кьил Мегьамед Жалилова, 2-чка кьур Рубас хуьруьн СОШ-дин командадив медаларни савкьатар Ягья Гьажиева, 3-чка кьур Геджух хуьруьн СОШ-дин командадив Мажмутдин Семедова, рикlиз теселли гунин савкьатдиз лайихлу хьайи Лукlарин СОШ-дин командадив Анвер Гьажимурадова вахкана.
Турнирда виридалайни хъсандиз къугъвайбурни къейдна: Амин Саидов (Рубас), Насрулла Салигьов (Геджух), Рустам Муталимов (Берикей).
Къагьриман Ибрагьимов
