Мегьарамдхуьруьн райондин Филерин хуьряй чаз чар атана. Ам  жемятдин тIвару­нихъай хуьруьн администрациядин кьил Абдулмалик Эмиргьамзаева кхьенва.

“И йикъара чав рикI къарсатмишдай чIулав хабар агакь­на­:  Махачкъалада, вичи яргъал йи­сара республикадин кьилин вузрикай сад тир Даггоcпед­­­универ­ситетдин математикадин факультетда доцентвиле кIва­ла­хай бажарагълу муаллим, гьуьр­­мет­лу, камаллу инсан, гьа­кьван вичин балайриз, багърийриз, кIва­лизни хуьруьз, вири халкь­диз вафалу хьайи диде, баде, свас, руш   Мафи  Нази­ровна  Эсетова-Юзбегова  залум ажалди чавай къакъудна. Гьа­йиф…­

Ахьтин инсанар халкьдивай, чидайбурувай къакъатун еке магьрумвал я. Мафи Назировна чи, Филерин хуьруьн, агьалийриз гьакьван истеклу, гьуьрметлу, хайи руш хьиз, мукьва ва ба­гьа инсан тир. Ада вичин итим, ги­ла Дагъустандин халкьдин духтур, гьунарлу суьгьбетчи, мя­рекатрин тамада Азедин  Мурадович Эсетовахъ галаз  санал Кетин кьилин­ метIел алай чи куьгьне хуьре 1960-1961-йисара кIвалахна. Са­да мектебда математикадай тарсар гана, муькуьда чи больницада кьилин духтурвална. Абурун къуллугъ чи агьалийрин рикIелай гилани алатзавач. Эсетоврин хи­занди чахъ га­лаз алакъа вири йисара, хуьр арандиз куьч хьайи­лани, хуьзвай. Абур чи вири хи­йир-ши­йирдин крарин, мярекатрин иштиракчиярни тир.

Хуьруьн гьуьрметлу агьалияр тир Бегьер Велибегован, Жаруллагь Эмиргьамзаеван, Гьайбат Агьмадован, Айдунбег Ризаеван, гзаф  масабурун хизанрин арада и хизанни гьакьван гьуьрметлуди хьайиди  парабуру рикIел хкизва.

Мафи Назировнадихъ вичин предметдай кьетIен чирвилер авай. А хазина агакьай чи хейлин жегьилрикай вини дере­жадин муаллимар ва духтурар хьанва. Езибег Агьмадов, Рагьим Рагьимов, Межид Мегьамедов, Саият Абдулазизова, Фаргьад Гьуьсейханов, Ата Салигьов ва хейлин масабур гьа жергедай я. Ахьтин камалдинни ахлакьдин инсан къакъатуникди Филерин хуьруьн жемятди гзаф гьайиф чIугвазва.

За, хуьруьн администрациядин кьил язни, идалай виликни, Эсетоврин хизандихъ галаз сих алакъа хвейиди я. Гьар сеферда ана зав цIийи чирвилер агакьна. Инсанрихъ галаз рахадай, абурун къайгъу чIугвадай хейлин ре­кьер, тегьерар кьатIун­дай мумкинвал хьана. Амма вуч­да? Ажал завал я, инсаф чи­дач…

Чна, Филерин хуьруьн жемятди, администрацияди, хуьруьн собранидин депутатри Ма­фи Назировнадихъ яс чIугваз­ва, адан хизандиз, уьмуьрдин юлдаш Азедин Мурадович Эсетоваз, рухвайриз, вири багърийриз башсагълугъвал гузва.

Мафи Назировна Эсетовадин-Юзбеговадин экуь къамат садрани чи рикIелай алатдач. Ада чав тунвай багьа ирс, чирвилер ва тербия, экуь ниятар ва мурадар несилрив гумукьда ва давамарда.

Жемятдин тIварунихъай Абдулмалик Эмиргьамзаев, Филерин хуьруьн администрациядин кьил”