Меркезда Дагъустандин манийрин гьар йисан милли умуми концертар 16-сеферда кьиле тухвана. И хъсан кардин тешкилатчи “Прибой” медиахолдинг я.
Дагъустандин манийрин умуми фестивалда иштиракиз кIанзавай манидарар гзаф жезва, амма абур “Прибой” радиодихъ яб акалзавайбуру сесер гуналди тайинарзава. Йисан вахтунда чпин манияр радиодай гузвай, телеканалрай къалурзавай ва жуьреба-жуьре концертра сегьнедиз экъечIзавай манидарриз тамашачийри къимет гузва.
Алай йисан 31-январдиз Дуствилин кIвалин чIехи залдиз мад вишералди тамашачияр кIватI хьана ва абуруз чпин вилералди рикI алай манидарар аквадай, абуруз капар ядай, цуьквер багъишдай мумкинвал хьана. Манидаррилай гъейри, концертда кьуьлердайбурун дестейри, музыкантри, манийрин авторри, телеведущийри иштиракна.
“Йисан гьахъ-гьисаб” умуми концерт кьиле тухузвай Юлия Дибровади, Алиса Шагьназаровади ва Руслан Алибегова (къейд ийин, абуру чпин везифа еке пешекарвилелди ва устадвилелди тамамарна) сегьнедиз сифте нубатда Дагъустандин халкьдин артист, табасаранрин тIвар-ван авай манидар Марьям Къазиевадиз теклифна.
Сегьнени, зални хважамжамдин эквери, рангари безетмишна, залдиз ажайиб музыкадин сесер чкIана. Марьяман ширин сесини тамашачияр вичел желбна. Кьуьлерзавай рушарин дестеди сегьне мадни безетмишна…
Концерт саки кьуд сятда — давам хьана. Сегьнедиз гьам гзафбуруз таниш ва гьам цIийи манидарарни экъечIна. Абурун арада рутулви Гьуьруь Рагьманова, агъулви Зулфия Шабанова, Кристина, Рашид Багатаев, ТIавус Мегьамедова, Фатима, Зоя Чунаева, Гуьлхалум Гьажиева, Гьава Захаева… авай.
“Прибой” радиодихъ яб акалзавайбуру Мая Алимутаевади (шикилда) лугьузвай “Чан жуванбур” (чIалар — Билал Адилованбур, музыка — Къагьриман Ибрагьимован) манидизни бес кьадарда сесер ганвай. Ватанпересвилин, милли чIалал, хайи ерийрал, ватандашрал ашукьвилин мани Маяди пара устадвилелди тамамарна ва тамашачийри адаз гурлу капар яна.
Умуми фестивалдин вири иштиракчийриз цуьквер, дипломар ва “Йисан манидин гъалибчи” гафар кхьенвай кубокар гана.
Абад Азадов
