Махачкъаладин администрациядин кьил С.Амиров къуллугъдикай азад авурдалай гуьгъуьниз меркездиз 5 касди регьбервал гана. Садалайни я гьукуматди, я шегьерэгьлийри вилик эцигзавай месэлаяр тамамдаказ гьялиз хьанач.
Администрациядин кьилин къуллугъдал кас хкягъун патал конкурс малумарна. Ана 38 кандидатди иштиракна. Конкурсдин жюриди абуру шегьер вири терефрихъай вилик тухуниз талукьарнавай программайрихъ яб акална. Нетижада шегьердин собранидин фикирдиз пуд кас теклифна: Махачкъала шегьердин Кировский райондин собранидин председатель Абиева Эльмира, Москва шегьердин Басманный райондин управадин кьил Дадаев Салман ва Махачкъаладин администрациядин вице-мэр Ибрагьимов Абдулмуъмин.
Алатай гьафтеда кьиле фейи шегьердин собранидин сессияда РД-дин Кьилин ва Гьукуматдин Администрациядин регьбер Владимир Иванова иштиракна. Собранидин 45 депутатдикай сессиядиз 41 депутат атанвай. Сесер гайидалай гуьгъуьниз малум хьана хьи, Салман Дадаеваз 38 ва Эльмира Абиевадиз 3 депутатди сесер гана.
Дагъларин уьлкведин меркездин администрациядин кьилиз хкянавай С.Дадаев 1979-йисан 18-июлдиз дидедиз хьана. Ада ДГУ-дин юридический факультет акьалтIарна. Кьвед лагьай категориядин юриствилин дережа къачур жегьилди “Сулакэнерго” ОАО-дин юридический отделда кIвалахиз гатIунна. Идалай гуьгъуьниз ада “Таксомоторный 16-парк” ОАО-дин юридический отделдин начальниквилин везифаяр тамамарна.
2004-йисан июлдилай ам Москва шегьердин Метрогородок райондин управада юриствилин къуллугъдал кьабулна. 6 йисалай адакай гьа и райондин управадин кьилин 1-заместитель хьана. Кьве йисалай ам Москва шегьердин Сокольники райондин управадин кьилин экономикадин, эцигунрин ва ЖКХ-дин месэлайрай сад лагьай заместителвиле тайинарна. 2017-йисан майдилай ада Москва шегьердин Басманный райондин управадин кьилин къуллугъдал кIвалахзавай.
Са рахунни алач, махачкъалавийри шегьердин кьилиз кар алакьдай, чирвилер авай, йисаралди кIватI хьанвай важиблу месэлаяр гьялдай кас атун гуьзлемишзавай. Абуру цIийиз хкянавай Салман Дадаевак еке умудар кутазва.
Хийир Эмиров
