Сулейман-Стальский райондин администрациядин пресс-къуллугъди “Лезги газетдиз” хабар гайивал, РД-дин Халкьдин Собранидин образованидин, илимдин, культурадин, спортдин, туризмдин ва жегьилрин крарин рекьяй Комитетдин председателдин заместитель Гьамидуллагь Мегьамедова РД-дин Гьукуматдиз фикир гана кIанзавай месэлайрикай чар кхьена. Ана къейднава:
— 2019-йисан ва 2020-2021-йисара пландик кутазвай республикадин бюджетдик, Кьасумхуьрел эцигиз гъиле кьур спортивный комплекс ишлемишиз вахкудайвал, финансрин такьатар кутан;
— “2014-2017-йисара ва 2020-йисалди хуьруьн мулкар дурумлувилелди вилик тухунин” ФЦП-дик ЦIийи Мамрач хуьре 2019-йисуз фельдшервилинни акушервилин пункт эцигун патал такьатар кутан;
— “2014-2017-йисара ва 2020-йисалди хуьруьн мулкар дурумлувилелди вилик тухунин” ФЦП-дик 2019-йисуз Асалдхуьр, Шихидхуьр, Зугьрабахуьр, Сальян, Ичин, Бут, Хтун, Вини Хъартас, Агъа Хъартас хуьрера газдин линияр тухвана куьтягьдай такьатар кутан;
— 2019-йисуз республикадин районар ва шегьерар яшайишдинни экономикадин рекьяй вилик тухуниз талукь серенжемрик Алкьвадрин хуьре 110 аялдиз чкаяр авай школа (проектдин къимет 115 миллион манат) эцигун кутан;
— агьалийриз субсидияр тайинардайла, абур гьар йисуз талукь идарадиз коммунальный къуллугъар авунай буржар алач лугьудай справкаяр, документар вугуникай азад ийидай месэладиз килигин. А справкаяр, документар коммунальный къуллугъар ийизвай идарайрай УСЗН-диз вичиз къачудай ихтияр гана кIанда, инсанар инжиклу тийидайвал.
Къейд авун лазим я хьи, РД-дин Гьукуматдин тIварунихъ кхьенвай чарчиз республикадин экономикадин ва мулкар вилик тухудай, гьакIни РД-дин промышленностдинни энергетикадин министерствойрай жавабар ганва.
Субсидийриз талукь документар вугуникай РД-дин промышленностдин ва энергетикадин министр С.Умаханова кхьизва: “Къенин юкъуз РФ-дин Гьукуматдин къарардин бинедаллаз агьалийри чпиз субсидияр гун патал талукь идарадиз чпел коммунальный къуллугърай буржар алачирдан гьакъиндай документар агакьарун мажбури кар я. Гьавиляй агьалияр и жуьредин справкаяр кIватIуникай, гьазуруникай азад ийиз жедач”.
РД-дин экономикадин ва мулкар вилик тухунин министрдин заместитель А.Абдурагьмановалай хтанвай жавабда икI кхьенва: “…2019-йис патал туькIуьрнавай республикадин инвестицийрин программадин сергьятра аваз, Сулейман-Стальский районда “Сардархуьр-ДаркIуш-Къазмаяр водопровод” объектдал эцигунрин кIвалахар давамарун патал 100 агъзур манат чара ийидайвал я.
“Россиядин Федерациядин агьалияр гъил агакьдай ва къулай яшайишдин кIвалералди, коммунальный къуллугъралди таъминарун” госпрограммадин сергьятра аваз, 2019-йисуз Кьасумхуьрел 150 аялдиз чкаяр авай школадин дарамат (проектдин къимет 66 470,060 агъзур манат) эцигдайвал я.
Мадни, “2014-2017-йисара ва 2020-йисалди хуьруьн мулкар дурумлувилелди вилик тухунин” ФЦП-дин подпрограммадин сергьятра аваз, Асалдхуьруьз газдин линия тухунин кIвалахар патал финансрин такьатар чара ийидайвал я».
«Лезги газет»
