Чаз са акьван малум тушир гьайванар, къушар ва гьашаратар тIебиатда гзаф ава. Гьа ихьтинбурукай сад какапо я. И тIвар алай туьтуькъуш адетдин къушарилай тафаватлуди, ажайибди я. Ам анжах ЦIийи Зеландияда яшамиш жезва. ТипIрез ухшар тирвиляй адаз “типIрен туьтуькъушни” лугьуда. Какаподин кьил типIрендаз ухшар я. Амма къати къацу рангуни ам туьтуькъушдиз мукьва ийизва. ТIиб хьиз, какапони йифен къуш я.
Тажуб жедай делилрикай сад ам я хьи, лувар квай къуш ятIани, адавай эсиллагь лув гуз жезвач. Туьтуькъушрикай лув гуз тежезвайди анжах какапо я. Идалайни гъейри, вичин “багърийрилай” тафаватлу яз, какапо еке къуш я — адан заланвал 4 килограммдив агакьун мумкин я. Лув гуз жезвачтIани, хци къармахрин ва мягькем жакIумрин тапасрин куьмекдалди типIрен туьтуькъушдиз рагаризни тарариз акьахдай алакьун ава. ТIуьниз ада жуьреба-жуьре набататар, абурун тумар, кул-кусрин майваяр ишлемишзава.
Туьтуькъушарикай виридалайни яргъалди яшамиш жезвайдини какапо я. Юкьван гьисабдалди ам 90 йисуз кьван яшамиш жезва. И ажайиб къуш алай вахтунда терг хьунин къурхулувик акатнава.
Гьазурайди — Куругъли Ферзалиев
