Жегьил инсанди вичи хкягъай пешедиз вафалувални кIанивал гьикI къалурайтIа, гьадалай адан гележегдин къуллугъдин дережаярни аслу жеда. Ахьтин пешекарри чеб вилик эцигай макьсадрив агакьарунин, къуллугъ гьакъисагъвилелди тамамарунин кардиз кьетIен фикир гуда. Чпин кIвалахар агалкьунралди кьилиз акъудзавай лезги жегьил къуллугъчияр алай вахтунда Россиядин жуьреба-жуьре шегьеррани регионра тIимил авач. Новороссийскдин государстводин таможнядин инспекторвиле кIвалахзавай Марат Мегьамедкьасумович Гьажиевни гьахьтинбурукай сад я.
Марат 1984-йисуз Дербент шегьерда дидедиз хьана. 2001-йисуз Сулейман-Стальский райондин Агъа СтIал-Къазмайрин хуьруьн мектеб куьтягьайдалай кьулухъ Махачкъаладин ДГТУ-дин таможнядин факультетдик экечIна.
Кьилин образование къачур жегьил 2009-йисуз Новороссийскдин таможняда государстводин таможнядин инспекторвиле кIвалахал акъвазна. Алай вахтунда ам 1-классдин советникдин чин авай кьилин инспектор я.
Гьакъисагъвилелди кар кьилиз акъудзавай пешекар тирвиляй 2014-йисуз Марат Гьажиев, Сочида Олимпиададин къугъунар кьиле фидайла хатасузвал таъминарун патал командировкадиз ракъурна. Адаз вичин вилик квай месэлаяр, къуллугъдин везифаяр лайихлувилелди кьилиз акъудун хас я. И кардин гьакъиндай адахъ хьанвай агалкьунри, ганвай вини дережадин шабагьри шагьидвалзава.
2014-йисуз Сочи шегьерда XXII Олимпиададин ва XI Паралимпиададин хъуьтIуьн къугъунрин гьазурвилер акуник ва кьиле тухуник метлеблу пай кутунай Марат Гьажиев Президент Владимир Путинан патай грамотадиз ва рикIел хуьдай медалдиз лайихлу хьана.
Бажарагълувилелди къуллугъзавай пешекар тирвиляй, РФ-дин экономикадин итижар хуьнин рекьяй са жерге крар тамамаруник пай кутунай чи ватанэгьлидиз 2014-йисуз федеральный таможнядин къуллугъдин руководитель А.Ю. Бельянинова Гьуьрметдин грамота гана.
Чирвилер ва кIвалахдин рекьяй тежриба авай Марат Гьажиева 2015-2017-йисара Новороссийскдин медицинадин колледжда 300-дав агакьна студентриз уьмуьр кьиле тухунин хатасузвилин тарсар гана.
Гьуьрметлу хизанда пуд аялдиз тербия гузва. Йиса садра вичин ватандиз хквезни алахъзава. “Хайи Агъа СтIал-Къазмайрал ва Дербент шегьерда хьун са лезет я. Идалайни гъейри, жуван аялриз ватан чирун, ам кIанарун за лап важиблу месэла яз гьисабзава”, — лугьузва Марат Мегьамедкьасумовича.
Чаз Марат Гьажиев мадни кьакьан дережайрив агакьна кIанзава.
Куругъли Ферзалиев
