Мукьвара Мегьарамдхуьруьн районда 2004-2005-йисара дидедиз хьайи жаван спортсменрин арада азаддиз кьуршахар кьунай Дагъустандин кIвенкIвечивал патал ЮТО-дин акъажунар кьиле фена. Сулейман-Стальский райондин администрациядин пресс-къуллугъди «Лезги газетдиз» хабар гузвайвал, и акъажунра райондин спортсменри хъсан чкаяр кьуна.
Акъажунра Дагъустандин 12 райондай ва 2 шегьердай вири санлай 112 спортсменди ва 14 командади иштиракна. Спортдин и жуьре машгьурунин ва РД-дин КIвенкIвечивал патал кьиблепатан зонадин хкягъай команда тайинарунин макьсаддалди кьиле фейи спортдин мярекатдиз Сулейман-Стальский райондин физкультурадин, спортдин, туризмдин ва жегьилрин крарин комитетди 11 жегьил ракъурна.
Акъажунрин нетижада Хасавюрт шегьерда азаддиз кьуршахар кьунай кьиле фидай республикадин дережадин акъажунра иштиракдай викIегь спортсменар тайинарна. Сулейман-Стальский райондай тир Адам Гьамзатова (55 кг) ва Мурад Эрзиманова (71 кг) 2-чкаяр кьуна, Димир Димиров (80 кг) 3-чкадал хьана.
Агалкьунар хьайибуруз грамотаярни медалар гана.
«Лезги газет»
